Spildra North AS lea ožžon 250 000 ruvdnosaš doarjaga Sámedikkis fanasinvesteremii.
Sámediggi čállá preassadieđáhusas ahte dát fitnodat bidjá stuorra deattu báikkálaš historjái ja kultuvrii lassin luondduvásáhusaide. Spittás lea leamaš mearrasámi ássan máŋggaid čuđiid jagiid. Deaŧalaš oassi dan vásáhusas maid sii fállet, lea ahte turisttat besset oahpásmuvvat sámi árbevieruide, dál ja ovddešáiggiin. Spildra North AS áŋgiruššá maiddái dakkár surggiiguin go guolástemiin, guovssahasain, fálláin ja buokčalemiin.
– Lea hui buorre go fitnodat čalmmustahttá mearrasámi historjjá. Sápmi dárbbaša ollu fitnodagaid mat gaskkustit dán oasi min historjjás, dadjá sámediggeráđđi Silje Karine Muotka (NSR).
Cegget eanet bargosajiid Návutnii
Spittá lea suolu Návuona suohkanis Romssa ja Finnmárkku fylkkas. Nu mo daddjui, de lea fitnodat ožžon doarjaga fanasinvesteremii vai sii sáhttet sáhtostit báikkálaš olbmuid, turisttaid ja earáid Spittái.
– Mii dárbbašit dakkár fitnodagaid go Spildra North AS, mat dustet áŋgiruššat turismmain sámi guovlluin. Nu sii sáhttet leat mielde ceggemin eanet bargosajiid Návutnii, juoga mii guorrasa min ealáhuspolitihkkii, dadjá Muotka..
– Seammás lea deaŧalaš ahte báikkálaš olbmot sáhttet galledit Spittá, danne lea deaŧalaš doarjut dán investerema. Mii sáhttit leat mielde sihkkarastimin guovllu ássama, seammás go báiki šaddá geasuheaddjin, dadjá Muotka loahpas.
Várre jahkásaččat ruđa
Sámediggi várre jahkásaččat doarjjaruđaid máŋggabealat ealáhuseallima doaimmaheddjiide nannen dihtii sámi guovlluid ealáhuseallima. Doarjja Spildra North AS:i juolluduvvo ortnegis Ealáhuseallin, lotnolas- ja meahcceealáhusat, árvoháhkan ja ealáhushutkan.
