Dáhtut go ruovttus šleaŋggáhallat Rolf Amundseniin, Ivan Buljoin, Sara Ajnnakain, Marianne Penthain ja eará sámi artisttaiguin? Skilleduorastaga diibmu 21.00 lea avvir.no siiddus neahttakonsearta ja dan beasat návddašit nuvttá jus doalat Ávvira. Earáide máksá 50 ruvnnu ja nu sáhttá olles bearaš návddašit konseartta.
Doarjjo artisttaid nu ahte vippset/Svapet dahje Swishet njuolgga sidjiide DAHJE sáddet sin oktasaš vippsnummirii man Ávvir ja Altaposten hálddašit. Oktasaš vipps artisttaide lea : 29430 – čális AVVIR diehtun go vippset. Jus dán nummirii vippset, de dássidit juogadit sisaboađu buot artisttaid gaskkas.
– Mii bovdet dán erenoamáš áiggis áibbas earálágan ja amas beassáškonsertii ja mii sávvat olusat dáhttot geahččat dan ja ekonomalaččat doarjut sámi artisttaid geat dál leat massán dietnasa, lohká Ávvira váldoredaktevra Kari Lisbeth Hermansen.
Korona njoammodávda lea rievdadan buohkaid árgabeaivvi. Eanaš sajiin leat njuolggadusat dan hárrái ahte gallis sáhttet ovttas vánddardit ja gallis sáhttet čoahkkanit. Ovtta nuppi doaluid leat šaddan šluhttet ja artisttat leat okta dain geat leat massán dietnasa. Go beakkehii ahte visot doalut leat šluhttejuvvon, de ihtigohte neahttakonsearttat gos gehččiin lea vejolaš doarjut artisttaid earret eará vippsema bokte. Dál Ávvir ge čuovvula.
Ráhkkan dál juo
Jus leat ovdalaččas Ávvir-diŋgojeaddji, de beasat njuolga konsertii. Dágut fal ahte dus lea sisabeassan sátni. Jus ii leat, de váldde minguin oktavuođa ja mii ordnestat dan. Oza dieđuid dáppe dahje sáddes maila: abonnement@avvir.no
Máksá 50 ruvnnu jus it leat Ávvir-diŋgojeaddji ovdalaččas. 50 ruvnnuin beassá olles bearaš geahččat konseartta, ja dasa lassin Ávvira ođđasiid lohkat mánu. Dáppe diŋgot Ávvira abonnemeantta ja daga dan dál juo, vai leat gearggus.
– Go diŋgot min aviissa, de sihkkarasttát maiddái journalisttaid bargosaji. Máŋga media leat juo šaddan permiteret bargiid, ja dan eat dáhtošii mii, lohká Hermansen.
Oktasaš ja priváhta VIPPS – SWISH
Konsertii servet artisttat geat leat eret sihke Suomas, Ruoŧas ja Norggas. Sivas go ii sáhte vippset Ruoŧa beale artisttaide ja nuppe ládje, de geavahit maiddái Altapostena VIPPS. Jus dán nummirii vippset, de dássidit juogadit sisaboađu buot artisttaid gaskkas. Oktasaš VIPPS: 29430 Čális dieđu: AVVIR vai diehtit sihkkarit ahte dát ruhta galgá artisttaide.
– Geavat áinnas dan oktasaš vippsa, muhto jus fal háliidat njuolgga artistii vippset, de gávnnat sin vippsa dahje swisha dán artihkkala govain, Facebook event-siiddus dahje juo šearpmas dan botta go artisttat lávlot. Lea lohpi dál juo vippset jus fal lea miella. Mun sávan min artisttat ožžot buori sisaboađu, nu ahte ávžžuhan rabastit ruhtaburssa dál go juo eat beasa eará konsearttaide ovdal go dát Covid19 áigi lea nohkan, ávžžuha Hermansen.
JA DE DIEĐUSGE LEA MIS GILVU GE: Mii vuorbádat 10 flaksavuorbbi! Bidjal Instagramii gova dahje filmma du dánsenláhtis dahje dan botta go juoiggat olles čoddagin ja gilkurastte dan: #avvirkonsearta
Ávvir vuordá vel moatti artisttas vástádusa leago vejolaš searvat.