Viessoeaiggát ii oaččo bidjat muohttaga johtolatareálii (vázzinravdii/ geaidnobánii/ geaidnoravdii) go čorge muohttaga viessosajistis.
– Go dattetge dáhpáhuvvá, de sáhttá viessoeaiggádii sáddejuvvot rehket liigebargguid ovddas maid gieldda geainnuid vástideaddji entreprenevrra gártá bargat, čállá Kárášjoga gielda.
Rehket sáddejuvvo
Vuojánat ja goallosjorrit mat heađuštit boltunveaga sirdojuvvojit.
– Jus dattetge báhcet sirddekeahttá, de vuojánat/ goallosjorrit sirdojuvvojit eaiggáda rehket ala, dieđiha gielda.
Gieldda ovddasvástádus
Geaidnolága mearrádusaid vuođul gielddas lea ovddasvástádus boltut muohttaga gielddalaš geainnuin ja gáhtain. Stáhtas lea fas ovddasvástádus boltut riikka- ja Eurohpageainnuin ja fylkkagieldda ovddasvástida boltut fylkkagielddalaš geainnuid.
