Boahtte dálvvi rájes sáhtát gárdut áigodateari haga.
Finnmárkkuopmodat čállá preassadieđáhusas ahte sin stivra mearridii cuoŋománu 18. beaivvi 2020 heaittihit otná áigodateari ortnega. Áigodateari sadjái boahtá sierra bivdokoarta daidda geat áigot gárdut Finnmárkkuopmodagas.
– FeFo dáhttu loktet beroštumi gárdumii. Dát lea Finnmárkkulága ulbmila olis. Mii deattuhat lagasvuođa valljodagaide ja árbevirolaš ávkkástallama, ja dasa lassin meahci mearkkašumi olbmuid identitehtii, meahcásteapmái ja vásáhusaide, lohká stivrrajođiheaddji Máret Guhttor preassadieđáhusas.
Ain guoddevaš rievssathálddašeapmi
Gárdun lea unnon sakka maŋemuš 15-20 jahkái, ja dahká dál binnánaš oasi obbalaš bivddus. Guhttor deattuha ahte rievssathálddašeapmi Finnmárkkuopmodagas galgá ain leat guoddevaš ja ávžžuhuvvon bivdodási siskkobealde.
– Mii sávvat dáid doaibmabijuid movttiidahttit eambbo vuoigatvuođalaččaid geavahišgoahtit árbedieđu mii gullá gárdumii, dadjá Guhttor preassadieđáhusas maid Fefo lea sádden.
