Bohccuin lea dál hearkkes dilli dálveguohtumiin ja dan dihtii giddejuvvo skohterláhttu 2 Guovdageainnu suohkanis gaskaboddosaččat njukčamánu 20. beaivvi rájes.
Romssa ja Finnmárkku fylkkamánni lea mearridan giddet skohterlahttu 2 (guokte) Guovdageainnu suohkanis, Guovdageainnu eanu rájes gitta Suohpatjávrri máttageahčai. Geahča kártta. Rukses sárggis kárttas čájeha guovllu gos skohterláhttu giddejuvvo. Mohtorjohtolatgielddus lea gustovaš njukčamánu 20. beaivvi 2020 rájes ja bistá nu guhkká go lea dárbu. Buot sierralobit mat leat addojuvvon vuodjit dán guovllus, gessojuvvojit ruovttoluotta gaskaboddosaččat. Dat mearkkaša go dát gaskaboddosaš mohtorjohtolatgielddus fámohuvvu, de doaibmá fas sierralohpi. Sivva dása lea go bohccot leat hearkkes dilis heajus guohtuma dihtii.
