Fargga sáhttá sámegillii gártet lohkama ja oainnu.
Statped čállá preassadieđáhusas ahte dál boahtá fargga gártenávnnas davvi-, lulli- ja julevsámegillii.
Sii leat ovttasbargan Sportvision-nammasaš fitnodagain ráhkadan vuosttaš sámi gártenávdnasa sámegielaide. – Lea dehálaš ahte buohkat besset atnit iežaset giela go galget gártet oainnu ja lohkama, dadjá Lone Nergård Boine, gii lea Sámi erenoamáš pedagogalaš doarjalusa ráđđeaddi.
Lahčit oahppodilálašvuođa
Ulbmil PVles ávdnasiin lea mearkkašit makkár teakstasturrodagas oahppi lohkagoahtá njozebut. Dat gohčoduvvo critical point for reading (CPR).
– Dat lohku ii leat seamma go visus, dat man čielgasit oainnát, muhto logus lea mearkkašupmi lohkamii. Nu sáhttá álkit oaidnit man stuoris teaksta ferte leat dahje man olu ferte stuoridit dábálaš teavstta nu ahte lohka njuovžilit ja geahppasit, čilge ráđđeaddi Lone Nergård Boine.
Preassadieđáhusas čállet ahte dát leat hui ávkkálaš go galget láhčit dili oahpahusdilálašvuođas ja ipmirdit man buorre oaidnu oahppis lea.
Sámi sánit earáláganat
Dássážii eai leat gávdnon gártenávdnasat sámegillii. Lea dehálaš ahte buohkat ožžot vejolašvuođa atnit eatnigiela gártenbargguin.
– Go gártejit, de ferte mánná, gii beaivválaččat lohká sámegiela, maiddái geahččaluvvot sámegillii vai oažžu rievttes bohtosiid. Jus oahppis goalmmát luohkás lea eambbo hárjáneapmi lohkat sámegiela go dárogiela, dat sáhttá čuohcat bohtosiidda, muitala Boine preassadieđáhusas.
Oaidnováttuid gávdnat
Lea oaivvilduvvon ahte ávnnas galgá leat okta máŋggain reaidduin go galget oaidnováttuid čielggadit mánáid goalmmát luohkás bajás, nuorain ja rávesolbmuin. Ávdnasa sáhttet atnit čalbmedoaktárat, PP-ráđđeaddit, optihkkarat ja earát geat barget sámegielagiid oaidnováttisvuođaid gártemiin.
