Nuorra boazodoalli oaivvilda leat veadjemeahttumin boazodoalus birget 75:in heakkain. Dál lea su advokáhtta stevdnen stáhta ja Eanandoallodepartemeantta.
Nuorra boazodoalli oaivvilda leat veadjemeahttumin boazodoalus birget 75:in heakkain. Dál lea su advokáhtta stevdnen stáhta ja Eanandoallodepartemeantta.
– Dát lea dehálaš ášši mu klientii. Muhto ráhkada maid presedeanssa buot boazodolliide geaidda lea mearriduvvon gorrelogu mielde geahpedit boazologu. Ja dát dávjá čuohcá garrasepmosit nuorra boazodolliide, geain leat smávva ealužat ovdal jo go stáhta geahpedišgoahtá, čilge advokáhtta Trond Biti iFinnmark:ii.
75:in heakkain galgá birget
Trond Biti dat ovddasta goalmmátlot-jahkásaš boazodoalli guhte lea stevdnen Eanandoallo- ja biebmodepartemeantta boazologugeahpedan mearrádusa Sis-Finnmárkku diggegoddái. Advokáhtta lea gohččon dikki hilgut mearrádusa man departemeanta dagai dán boazodoalli boazologu ektui njukčamánu 10. beaivvi 2014:s. Stáhta mearrádusa mielde eai oaččo dán albmás eanet go 75 heakka.
– Ii doala
Biti oaivvilda ahte gorreloguprinsihppa ii doala ollásit.
– Ferte leat juohke siidaoasuseaiggáda riekti eaiggádit unnimusat 250 sturrosaš ealu, ja das rájes de sáhttet gorreloguin mearredit. Departemeantta mearrádus lea maid dáhkkon boasttudieđuid vuođul, čuožžu stevdnemis.
– Veadjemeahttun iežas kultuvrra mielde eallit
Advokáhtta oaivvilda boazologugeahpedeami mii lea mearriduvvon, rihkkut álbmotrievtti. Son čujuha ON-konvenšuvdnii siviila ja politihkaš vuoigatvuođaid birra nannet dan ahte olbmos lea «riekti šaddadit iežas kultuvrra».
– Dán albmái šaddá veadjemeahttun iežas kultuvrra mielde eallit dáinna boazologuin mii sutnje lea mearriduvvon. Lea sihkkaris riektu ahte álbmotriekti maid suodjala ekonomalaš beali. Duohtavuođas ii leat dán boazodoallis vejolašvuohta bargat bohccuiguin dainna ođđa boazologuin. Son koŋkána jus joatká ealáhusas, čállá Biti stevdnemis.
– Jus dát boazodoalli vásiha bárttiid dahje heajos guohtumiid de sáhttá su boazolohku jođánit njiedjat vuolábeallai 50. De sáhttá son massit rievtti eaiggádit bohccuid, čilge Biti iFinnmark:i.
