Luossadávda mii lea Davvi-Ruoŧa jogain, goddá olu luosaid. Áššedovdiin ii leat čoavddus.
Luossadávda mii lea Davvi-Ruoŧa jogain, goddá olu luosaid. Áššedovdiin ii leat čoavddus.
Rávttošnjárgga Capminga Geir Aarskog fuolastuvvá dávdda geažil mii lea leavvan Davvi-Ruoŧa luossajogaide. Son ávžžuha buohkaid geat leat daid jogain leamaš, bures desinfiseret ja bassat oaggunrusttegiid, čállá iFinnmark.
Eai dieđe makkár váikkuhusat leat
Vearrámusat lea dávda leavvan Duortnosjogas, muhto maiddá Juleveanus, Bihtánjogas ja eará čázádagain galgá leat dávda. Stefan Stridsman, Norrbottena leanastivrras, dadjá Aftonbladii ahte lea veadjemeahttun diehtit man olu luosat leat jápmán dávdi maŋimuš guovtti jagis. Eai ge dál dieđe vuos mo dávda váikkuha nállái.
Ruoŧa mearra- ja čáhceváldi (Hav) čuovvu ovdáneami.
– Eat sáhte áktánasat maidege dahkat. Mii váldit iskosiid ja sáddet daid sisa, muhto lea váttis gávdnat siva, dadjá Fredrik Nordwall, guhte lea biologalaš máŋggabealátvuođa hoavda Hav:s.
Ii hálit dávdda Norgii
Rávttošnjárgga Campinga Geir Aarskog lea dál luomus Bottenvikas, ja lea fuolastuvvan go gulai dán birra.
– Ruoŧa mediat dieđihit dán dávdda leat dakkárin mii njoammu, dadjat jo buot luosaide. Luossavuoivasat leat áibbas rátnásat, čilge son.
Aarskog ballá dávdda njoammut Norgii.
– Dát lea hui lahka min. Lea áibbas dehálaš ahte olbmot bures basset oaggunrusttegiid. Dát lea logi geardde vearrát go gyro. Buot rusttegiid fertejit desinfiseret. Dát lea hirbmat balddihahtti, dadjá son.
