Sámediggi áigu loktet áššin veahkaválddálašvuođa nissoniid vuostá ON nissonkommišuvdnii.
Sámediggi áigu loktet áššin veahkaválddálašvuođa nissoniid vuostá ON nissonkommišuvdnii.
Sámediggi ja Forum for kvinner og utvikling (FOKUS) lágidit seminára Ovttastuvvan Našuvnnaid (ON) nissonkommišuvnna CSW60 oktavuođas New Yorkas fáttáin «Violence against indigenous women», čállá Sámediggi preassadieđáhusastis.
Diimmá dutkan čájeha ahte 49 proseantta dain nissoniin geain lea sámi duogáš, leat gillán veahkaválddi, dan ektui go 35 proseantta čearddalaš dáža nissonat. 22 proseantta sámi nissoniin almmuhit ahte sii leat gillán seksuála veahkaválddi, beroškeahttá agis, dan ektui go 16 proseantta nissoniin muđui. Čájehuvvo maiddá riikkaidgaskasaš dutkamiidda mat orrot čájeheamen eanet veahkaválddi lagas gaskavuođain álgoálbmogiid gaskkas, ja erenoamážit veahkaválddi álgoálbmotnissoniid vuostá.
Dutkat sivaid
Sámediggepresideanta, Aili Keskitalo, oaidná hui duođalažžan dáid dutkangávdnosiid.
– Veahkaváldi ja illasteapmi goittotge lea dohkkemeahttun, muhto ahte lea čájehuvvon erohus gaskal sápmelaččaid ja čearddalaš dážaid lea juoga man ferte duođas váldit. Gávdnan dihtii sivaid dasa ferte dán dutkat lagabui, dadjá Aili Keskitalo.
Ii leat priváhta ášši, muhto servodatovddasvástádus
– Veahkaválddi vuosttaldeapmi lagas gaskavuođain ii leat priváhta ášši, muhto servodatovddasvástádus miehtá máilmmi. Sámediggi háliida leat mielde váldimis dán ovddasvástádusa, ja seminára lágidemiin New Yorkas ON nissonkommišuvnna čoahkkima oktavuođas mii háliidit váikkuhit dasa, dadjá sámediggepresideanta Aili Keskitalo.
Dásseárvoministtar oasálastá maiddái
Keskitalo oassálastá lágideapmái ovttas earret eará mánáid- ja dásseárvoministariin Solveig Hornein guhte maid oasálastá «Violence against indigenous women» sekšuvdnii. Seminára lágiduvvo Mearraolbmáidgirkus New Yorkas njukčamánu 14. beaivvi.
