Muhtin pasieantat soitet šaddat maŋidit doavtterdiimmu ja čuohpadeami buohcciviesus go 194 doaktára ja eará buohcciviesu bargit leat váldon bargoheaitagii gaskavahkku iđida rájes.
Muhtin pasieantat soitet šaddat maŋidit doavtterdiimmu ja čuohpadeami buohcciviesus go 194 doaktára ja eará buohcciviesu bargit leat váldon bargoheaitagii gaskavahkku iđida rájes.
Akademikerne ja Spekter eaba soabadan go šiehtadallan loahpahuvvui mannan ija.
Akademikerne váldet 194 miellahttu Oslo universitehtabuohcciviesus, Østfold buohcciviesus, Bergenis buohcciviesus, Helse Stavanger ja Finnmárkkubuohcciviesu bargiid bargoheaitagii gaskavahkku iđida rájes. Badjel 100s sis leat doaktárat. Bearjadaga váldet vel 119 miellahttu mielde bargoheaitagii.
Ožžot ođđa gohččuma
Buohcciviesut gos bargoheaitta lea, muitalit ahte olbmot geain lea diibmu buohcciviesus dahje galget čuohpaduvvot, ožžot ođđa gohččuma.
Finnmárkkubuohcciviesus leat golbma doaktára ja njeallje dearvvašvuođabargi váldon bargoheaitagii.
Ii galgga leat heaggavárálaš pasieanttaide
Sii geat leat bargoheaitagis leat doaktárat, ingenievrrat, ekonomat, juristat ja servvodatdiehttit. Bargoheaitta ii leat vuos nu viiddis, ii ge galgga leat heaggavárálaš dilli pasieanttaide. Bargoheaitta ii čuoza borasdávdadikšumii, psykalaš dearvvašvuhtii ja mánáid dikšui, čállá Akademikerne sin neahttasiiddus.
Buohccidivššárat dorjot doaktáriid bargoheaitaga
– Soahpatmeahttunvuohta lea bargonoađi ja pasieantasihkkarvuođa birra, ja dat gullá buohkaide, muitala Norgga Buohccidivššáriid searvvi (NSF) jođiheaddji Eli Gunhild By.
Son lohká ahte NSF ballá garraset bargoáiggiid sáhttit čuohcat bargiid dearvvašvuhtii, mii fas sáhttá goaridit pasieantasihkkarvuođa.
Spekter šálloša
Spekter lohká ahte sii eai gáibit rievdademiid bargoáiggis, muhto baicce buoret heivehanmuni vai sáhttet resurssaid buorebut geavahit.
– Spekter šálloša go Doavttersearvi lea válljen čađahit bargoheaitaga, go eai leat ožžon dohkkehuvvot sin gáibádusaid mat dagahit buohcciviesuide váttisin plánet fálaldaga pasieantarivttiid oktavuođas, eisseválddiid rávvejumiid, alla vuordámušaid álbmogis ja ođđa spesialistaoahpu doaktáriidda, muitala Spekter bargoaddisearvvi direktevra Anne-Kari Bratten preassadieđáhusas. (©NTB)
