Kárášjoga skohtercrossavuoddji Joachim Olsen váldá bottu vuodjimis skohtercrossa ja dat maŋimuš gilvu ruovttubáikkis čuozai su dovdduide. Geahča govaid ja video dás!
Joachim Olsen lea vuodján skohtercrossa 11 jagi ja dál son lea mearridan váldit bottu gilvaleames skohtercrossas.
Maŋŋá go lei vuodján maŋimuš gilvvu Røverheat stádioncrossa bánas Kara-X gilvvus de lei gilvu hui dovduičuohci sutnje.
– Dál lei mu maŋimuš gilvu ja mun válddán dál bottu, mun in dieđe vel man guhká muhto mun váldán goit bottu. Lei somá ja lei buorre dovdu gilvalit ruovttus dan maŋimuš gilvvu, lohká Olsen.
Losses jahki
Vaikke son lohká leat hárjehallan buorebut dán jagi, de lea leamaš losses jahki sutnje go su lagamusat leat vádjolan.
– Mis lea olu mii lea geavvan min bearrašis dan maŋimuš áigge, máŋggas mu lagamus fulkkiin leat vádjolan eret ja sii leat leamaš mu vuosttaš sponsorat, dat lea lossat. Mun jáhkán dat lea buoremus munnje váldit bottu, dát lea leamaš mu eallin 11 jagi, nu ahte lea lossat, muitala Olsen ganjalčalmmiiguin.
Buori ávát bárdnái
(Ášši joatká vuolábeale gova)
Su eadni Inger Anne Utsi buorresta bártnis maŋŋá go lea joavdan mollii ja son maid ferte sihkastit gatnjaliid go lea Joachima maŋimuš gilvu dán vuoru.
– Lea leamaš losses jahki, olu mii lea geavvan ja dát dálvi ii boahtán johtui nu mo galgá, lohká Utsi.
Joachim Olsen bođii nubbin Pro stock gilvvus ja goalmmádin Røverheat gilvvus stádioncrossas.
