Go skuvllat álget čakčii, de váilot 1700 oahpaheaddji Norgga skuvllain, čájehit Oahpahuslihtu ođđa logut.
Go skuvllat álget čakčii, de váilot 1700 oahpaheaddji Norgga skuvllain, čájehit Oahpahuslihtu ođđa logut.
Ođđa oahpaheaddjenorbma, mii doaibmagoahtá borgemánu 1.beaivvi rájes, mielddisbuktá ahte leat 1666 oahpaheaddji beare unnán, lihtu loguid mielde, čállá NRK.
Okta oahpaheaddji – 15 oahppi
Oahpaheaddjenorpma mihttu lea ahte galget leat 16 oahppi juohke oahpaheaddji nammii mat leat vuosttaš luohkás gitta njealját luohkkái, ja 21 oahppi juohke oahpaheaddji nammii viđat luohkás logát luohkkái.
2019 rájes galgá dát lohku unnut vel eanet. Dalle galget leat 15 oahppi vuosttaš gitta njealját luohkkái, ja eanemusat 20 oahppi viđat gitta logát luohká mánáide.
Oččodit eanet oahpaheddjiid
2019 čavčča rájes váilot 917 oahpaheaddji lassin, ja gártet 2583 oahpaheaddji mat váilot, dieđiha lihttu NRK:i.
– Dat lea alla lohku, eat ge leat sihkkarat movt galgat nagodit háhkat nie ollu oahpaheddjiid nie oanehis áiggis. Mii šaddat bargat buot maid nagodit vai oažžut eanet oahpaheddjiid bargui, ahte eambbogat háliidit boahtit fas dán bargui, ja ahte sii geat eai šat bargga oahpaheaddjin, bohtet fas ruovttoluotta, lohká Oahpahuslihtu nubbijođiheaddji Terje Skyvulstad.
Son deattuha ahte lihttu lea ilus go norbma čađahuvvo, muhto de fertejit eanet doaimmat maid bidjet johtui vai sihkkarastit ahte leat doarvái oahpaheaddjit čavčča rájes.
Gohčoda heahtedillin
Rogalándda fylkkajođiheaddji Gunn Reidun Tednes-Aaserød gohčoda dán dili heahtedillin.
– Ii leat dávjá ahte logan sáni «heahtedilli», muhto dál lea dilli juste nu. Mis lea rekrutterenheahti, ja lean duođas vuorjašuvvan, lohká son.
(©NTB)
