Juohke viđát olmmoš návddaša alkohola go rahčá lossamielain, streassain dahje háliida eret dovdduin. – Sáhttá dagahit dili vearrábun, váruha alkovierrojođiheaddji.
Logut, mat bohtet ovdan Ipsos iskkadeamis, leat vuorjašuvvan vuođđun, oaivvilda alkovierroorganisašuvdna «Av-og-til».
– Juohke viđat dáčča juhká alkohola, vai ii dárbbaš dovdat. Alkohola lea jeđđehussan ja muhtumiidda sáhttá leat ávkin vai lossa dovddut jávket. Muhto guhkit áigge badjel, de sáhttá dagahit dili vearrábun, ja sáhttá nanosmahttit váttuid ja buktit ođđa váttisvuođaid, čilge «Av-og-til» generálačálli Ragnhild Kaski preassadieđáhusas.
Váralaš spirála
Eallimis vásiha beali álbmogis muhtinlágan psyhkalaš váttisvuođa. Alkohola sáhttá dagahit ja nanosmahttit psyhkalaš váttisvuođaid, ja lea čanastat alkoholageavaheamis ja balus ja deprešuvnnas.
– Psyhkalaš váttisvuođaid ii galggaše ieš dálkkodit alkoholain, go sáhttá vearáskahttit dilálašvuođa. Seammás lea nu ahte áiggi badjel dárbbaša olmmoš eambbo alkohola, vai dovddut jávket, go dan maid álggos dárbbašii. Boađus lea ahte olmmoš darvána spirálii mas juhká eambbo ahte eambbo, ja šaddá heajut ja heajut psyhkalaš dearvvašvuohta, čilge Kaski.
Kaski deattuha ahte ii leat dušše alkohola mii váikkuha psyhkalaš dearvvašvuhtii. Sáhttá jorrat nuppe guvlui maid.
– Deprešuvdna sáhttá leat váttisvuohta mii dagaha ahte olmmoš juhká eambbo alkohola. Dutkamat čájehit ahte pasieanttat, geain lea deprešuvdna, leat maid darvánan gárrenmirkkuide.
Olbmot eai dieđe
Golggotmánu 10. beaivvi lei riikkaidgaskasaš psyhkalaš dearvvašvuođabeaivi. Generálačálli oaivvilda ahte lea dehálaš čalmmustahttit makkár váikkuhusat alkoholageavaheamis sáhttet leat, jus geavaha alkohola jávkadit dovdduid ja jurdagiid.
– Min guorahallamat čájehit ahte lea čanastat alkoholageavaheamis ja balus ja deprešuvnnas. Olmmoš lea nu ahte diehtá mii sutnje ii leat buorre. Go lea alkoholageavaheamis ja psyhkalaš dearvvašvuođas sáhka, de eai dieđe. Mii fertet diehtit mas mii galgat váruhit, ovdal go lea menddo maŋŋit, oaivvilda Kaski.
