Sámediggepresideanta fuolastuvvá Biebmobearráigeahču dieđu dihte ahte Byrkije guovllu bohccos lea fuomášuvvon positiiva CWD-iskkus álgoiskosiin.
– Dat lea duođalaš, ja mii vuoruhit čuovvoleami sakka, dadjá sámediggepresideanta Silje Karine Muotka (NSR) preassadieđáhusastis.
Bohccos, mii njuvvojuvvui čakčamánu 9. beaivvi Byrkijes, Nordlándda ja Trøndelága rádjeguovllus, lea álgoiskosiin fuomášuvvon CWD-dávda. Álgoiskosat čujuhit dan guvlui ahte lea njommon, ja eanet analysat fertejit dahkkot. Loahpalaš iskkusvástádus vurdojuvvo gárvánit vahkkoloahpas, dieđiha Biebmobearráigeahčču.
CWD (Chronic Wasting Disease) -dávda lea dávda mainna sarvvaeallit jápmet, ja dat lea ovdal duođaštuvvon Nordfjella-guovllu ja Hardangerduoddara gottiin.
Ferte dakkaviđe kártegoahtit
Sámediggepresideanta Silje Karine Muotka dadjá ahte lea mearrideaddji bissehit dávdaleavvama, jus loahpalaš iskosiin duođaštuvvo dávda.
– Jus duođaštuvvo ahte bohccui lea njommon CWD-dávda, de fertejit eiseválddit ovttas Norgga Boazosápmelaččaid Riikkaservviin (NBR) ja boazoeaiggádat geaidda dát guoská dakkaviđe kártegoahtit viidodaga ja doaimmaid bissehan dihte njoammuma, dadjá Muotka.
Addán dieđu Ruŧŧii
Silje Karine Muotka bivdá maid ahte boazodoallit ožžot dieđuid ja buriid fágalaš rávvagiid dan birra movt galget dahkat dákkár dilis.
– Lea dehálaš ahte diehtojuohkin vuoruhuvvo hui bajás, erenoamážit daidda boazodolliide geaidda dat guoská, muhto maiddái boazodollui muđui maid, dadjá Muotka.
Sámediggepresideanta lea maid dieđihan Ruoŧa beale sámediggepresidentii Håkan Jonssonii vejolaš CWD-dávdda birra Byrkijes, mii lea hui lahka Ruoŧa rájá.
