Finnmárkku Politiijaguovlu lea ožžon dieđuid ja váidagiid dihtorverrošeami birra. Dat ii leat ođđa fenomena, muhto dát lea maŋemus áiggi lassánan riikaviidosaččat.
Finnmárkku Politiijaguovlu lea ožžon dieđuid ja váidagiid dihtorverrošeami birra. Dat ii leat ođđa fenomena, muhto dát lea maŋemus áiggi lassánan riikaviidosaččat.
– Mii leat ožžon dieđuid fitnodagain mat ieža leat fuobmán ahte muhtimat leat geahččalan verrošit, dahje báŋku lea fuomášan ja addán dieđu sidjiide geaidda guoská verrošeapmi, geat de fas leat viidásit politiijaide addán dieđu. Muhto dađi bahábut de eai álo fuomášuvvo dákkár verrošanrehkegat ovdal go leat juo máksán daid, lohká Finnmárkku politiijaguovllu ealáhusoktavuohta Olaf Andreassen.
Norgga fitnodaga ja olbmot lea bivnnuhat
Økokrim lea dán vahkku almmuhan ođđa áittaárvvoštallama mii čájeha ahte olgoriikka verrošeaddjit áinnas verrošit Norgga fitnodagaid ja priváhta olbmuid.
– Go visot galgá digitaliserejuvvot, de lea maid álkit viidábut verrošit, juoga mas mii Finnmárkkus eat ge beasa eret. Mii lávkulit dál verrošemiid alimus áigái, go geahččalit verrošit go dihtet ahte dál eai leat nu olu olbmot barggus iige soaitte nu buorre bearráigeahčču ge de. Unna ja gaskageardán fitnodagat leat dávjá geaid geahččalit verrošit, dadjá Andreassen.
Dárkkistit rutiinnaid
Direktevraverrošeami dovdomearka lea ahte olbmot lohket iežaset fitnodaga direktevran dahje hoavdan ja váldet oktavuođa bargiin ja hálaha su dahkat vearrivuođalaš transakšuvnnaid.
Dakkár dágut gohčoduvvojit CEO-verrošeapmin, čállá politiija preassadieđáhusastis.
– Buot fitnodagat berrejit geahčastit siskkáldas ekonomiijarutiinnaid ja erenomážit bidjat fokusa ruhtasirdimii mas lea oanehis máksináigemearri. Geasseluomu oktavuođas de lea geahpeduvvon bargoveahka ja unnit juogadeapmi barggubihtáin siskkáldasat fitnodagain. Dat mielddisbuktá ahte ruhtabeahttinriska lássána, lohká Olaf Andreassen.
Sevdnjes logut
Olaf Andreassen muitala ahte leat stuorra sevdnjes logut, go ovdal eai politiijat ávžžuhan olbmuid váidit.
Sivvan dasa lei go politiijain eai lean doarvái bargoneavvut dutkat dakkár áššiid, ja go lei sáhka verrošangeahččaleamis, iige fitnodat lean massán opmodaga dahje ruđa.
– Dál lea verrošan joavdán guhkkelii ja mii dál ávžžuhat buohkaid váidit dakkár daguid. Mii leat dieđusge politiijaid bealis ieža dagahan ahte leat ollu sevdnjes logut. Dál in dieđe galle váidima leat boahtán, lohká Andreassen.
Ollu čállinmeattáhusat ja e-poastačujuhus ii leat riekta
Son lohká das dovdomearkan ahte lea juoidá boastut rehkegis ahte leat ollu čállinmeattáhusat ja cealkagat eai soaitte leat rivttes láhkai huksejuvvon.
Muđuid sáhttet maid smávva erohusat e-poastačujuhusas.
– Lea dehálaš diehtit geas sáhttá vuordit rehkega. Stuorámus verrošeapmi Finnmárkkus mii lea dieđihuvvon politiijaide lea 50 000 eurosaš rehket mii sáddejuvvui fidnodahkii. Nu sáhttá leat stuorra vahát fitnodahkii jus ii čuovo mielde, lohká son.
Dieđit báikkálaš politiijai
Finnmárkku politiijaguovddáš sávvá ahte dákkár áššit dieđihuvvojit báikkálaš lensmánnekantuvrraide dahje politiijastašuvnnaide.
