Eahpesihkkaris njoammundili geažil lea Guovdageainnu suohkan dán jagi, nu go diibmá, válljen ávvudit Sámi álbmotbeaivvi neahttasáddagiin.
– Njoammumat leat lassánan maŋemus áiggi ja njoammudilli lea leamaš eahpesihkar, danin lea ge leamaš váttis gávdnat lágideddjiid Sámi álbmotbeaivvi doaluide. Lea mearriduvvon ahte Guovdageainnu suohkan almmuha filmma suohkana ruovttusiiddus ja Facebook-siiddus Sámi álbmotbeaivvi ávvudeami oktavuođas, čállá suohkan suohkana neahttasiiddus.
Filbma almmuhuvvo sotnabeaivvi guovvamánu 6. beaivvi dii. 12:00.
Suohkan dieđiha ahte ávvubeaivvi filmmas beasat oaidnit sátnejođiheaddji Hans Isak Olsena Sámi álbmotbeaivvi sártni, dasa lassin lea sámi kultuvrralaš guoimmuheapmi, ja sátnejođiheaddji geige 2021 kulturbálkkašumi.
