Mari Boine ja Maret Duo guoimmuhit Hársttáin dáid beivviid.
HÁRSTTÁK: Sámi álbmotbeaivi ávvuduvvo olles golbma beaivvi Hársttáid gávpogis. Bearjadaga guovvamánu 4. beaivvi doallá duo MARET konseartta Lillesalenis.
Lávvordaga lea ges Mari Boine lávddis Stuorasáles Hársttáid Kulturviesus. Mari konseartta maŋŋel leat feastamállásat Røkenes Gård báikkis.
Sotnabeaivvi lea sámegiel/ dárogiel ipmilbálvalus diibmu 11. Maŋŋelaš leat stuora olgodoalut Generalhagenis diibmu 14-16, gos guossohit sámi biepmu, doppe lávostallet ja dolastallet. Lea maiddái sámi disco gávpotluistenbánas ja eará iešguđetlágán doalut. Diibmu 15-16 ges lágida Harsttáid suohkan váldoávvudeami mas dollet sátnevuoruid ja gos leat kultuvrralaš ovdanbuktimat.
