Mannan vahkkus registrerejuvvojedje golbma koronanjoammuma Kárášjogas, ovttas lea omikronvariántta, dieđiha gielda.
Kárášjoga gielda dieđiha ahte 2022 vuosttaš vahkkus duođaštuvvui koronavirus golmma olbmos.
– Okta dáin bargá dearvvašvuođa- ja fuolahusbálvalusas. Gielda ásahii doaibmabijuid dan ektui. Mii leat čađahan njoammunguorrama ja leat testen sihke bargiid ja geavaheddjiid geat leat lagasoktavuođat, dieđiha gielda iežaset ruovttusiidduin.
Omikrona lea šaddan Davvi-Norgga dábáleamos koronavariántan, ja dat lea ge dál duođaštuvvon maiddái Kárášjogas.
– Dássážii lea duođaštuvvon ovtta olbmos omikrona, čállá Kárášjoga gielda.