Ođđa davviriikkalaš dutkosis boahtá ovdan ahte 95 000 olbmo sáhttet nagodit garvit borasdávdda oažžumis jus heitet borrguheames.
Dutkosa bohtosat maid muhtin davviriikkalaš dutkit leat dahkan, almmuhuvvojedje aiddobáliid European Journal of Cancer nammasaš dieđálaš áigečállosis.
Bohtosiin boahtá ovdan ahte olles 95 000 olbmo sáhttet garvit oažžumis duhpáha guoskevaš borasdávdda jus heitet borgguheames boahtte 30 jagis.
Badjel logádasoassi borgguhit Norggas
Sullii 11 proseantta Norgga álbmogis borgguhit beaivválaččat.
Dál borgguhit arvat unnit olbmot go 20 jagi dássái, ja lohku dievddut geat ožžot geahpesborasdávdda lea niedjan.
Seammás ožžot eambbo nissonolbmot geahpesborasdávdda.
Kreftregisteret direktevra, Giske Ursin, doaivu ahte ággan dasa ahte olu rávisolbmot borgguhit, lea ahte sii leat bisuhan iežaset borgguhandábiid.
– Jus mii galgat nagodit eastadit duhpátguoskevaš borasdávdda, de fertet mii oažžut nu olu go vejolaš 50-60-jahkásaččaid heaitit borgguheames. Addá stuora dearvvašvuođa vuoittu vaikko olmmoš leage badjel 50-jahkásaš go heaitá, earenoamážit nissonolbmuid gaskkas, lohká Urisin.
