Ealgabivdu lea loahpahuvvon muhtin báikkiin Finnmárkkus ja eará guovlluin ges lea bivdu bures jođus.
Dán rádjái bivddus lea 65% earis báhččon, ja Davvesiida-Gáŋgaviika-Davvinjárga lea guovlu gos buot stuorimus oassi earis lea báhččon. Doppe lea dán rádjái báhččon 84% earis, ja dat dahká 31 ealgga.
Guovdageaidnu ja Kárášjohka
Guovdageainnus ja Kárášjogas álggii bivdu čákčamánu vuosttaš beaivvi, ja muhtin guovlluin dáin suohkaniin lea bivdu jo loahpahuvvon.
Dán rádjái leat Guovdageainnus báhčán 61 ealgga ja dat lea 60% earis.
Kárášjogas ges leat báhčán 147 ealgga ja dat lea 63% earis.
Eanemus
Olles Finnmárkkus leat dán rádjái báhččon 600 ealgga. Earri lea oktiibuot 921 ealgga.
Deatnu lea dat suohkan gos eanemus ealggat leat báhččon, doppe leat báhččon 157 ealgga. Porsáŋggus ges leat báhččon 74 ealgga ja dat dahká 76% earis.
Riidoveadji bivdoguovllus gos Nikolaj Christiansen bivdá, ja Oarjjit Lágesvuonas gos Paul Erik Strifeldt bivdá, leat bivdojoavkkut báhčán 8 ealgga, dat lea eanemus Finnmárkkus dán rádjái.
