Leat stuora erohusat das man galle universitehtastudeantta gávnnahallat verrošeamis, dieđiha Khrono. Norgga studeantaorganisašuvdna jáhkká studeanttat meannuduvvojit iešguđetge láhkai.
526 studeantta gávnnahalle verrošeamis diibmá, Khrono dieđuid mielde.
Agder universitehtas (UiA) gávnnahalle 74:s verrošeamis, main 54:s bijahalle eret skuvllas. Universitehtas ledje eanet verrošanáššit go NTNU:s, gos leat golmma geardde eanet studeanttat go UiA:s.
Norgga biras- ja biodiehtaga universitehta (NMBU) Åsas válddahalle dušše guokte studeantta.
– Dát čájeha várra dan ahte njuolggadusat praktiserejuvvojit iešguđetge ládje, ja dan dihte gávnnahallet studeanttat ovtta ásahusa verrošeamis dávjjibut go eará ásahusain. Dat lea min mielas hui unohas, dadjá Norgga studeantaorganisašuvnna jođiheaddji Oline Sæther.
Láhkaevttohus
Rukses-bellodaga Hege Bae Nyholt, gii jođiha oahpahuslávdegotti, oaivvilda ahte dat stuora erohus ásahusaid gaskkas čájeha ahte lea dárbu eanet ollislaš njuolggadusaide.
– Lea váttis jáhkkit ahte studeanttat verrošit nu olu dávjjibut UiA:s go NMBU:s. Vuosttaš lávki lea defineret verrošeami universitehta- ja allaskuvlalágas, nu go Rukses-bellodat lea evttohan, dadjá Nyholt. (©NTB)
