500 gotti báhččon dán rádjái – stáhta bivdojoavku váldá juovlabottu

Sivva manin leat bivdimin gottiid lea go CWD-dávda njommon muhtin gottiide. Jus goddet olles ealu, de sávvet sii ahte dat jámolaš dávda jávká eret Norggas.

– Mii leat hui duhtavaččat johtoplánain. Lea buorebut mannan dán áigodagas go dan maid leimmet jáhkkán ja sávvan. Leamaš unnán beaivvádat ja gáibideaddji dálke- ja vuodjindilit, muitala Stáhta Luonddubearráigeahču (SNO) direktevra Pål Prestrud.

Eanemus báhče 64 ealli ovtta beaivvis.

Bealli ealus báhcán

Ovdal go dábálaš bivdináigodat álggii ledje ealus 2200 ealli. Leat dál báhččon 700 ealli dábálaš bivdináigodagas, ja badjel 500 ealli stáhta bivddus. Danin leat dál báhcán sullii duháha gotti Nordfjella goddeguovllus.

Buot eallit mat báhččojit leat iskojuvvon dárkilit leat go dat skihpagottit. Dán rádjái leat gávdnan dávdda golmma gottis stáhta bivddus ja njealjis dábálaš bivddus. Oktiibuot lea logi gottis leamaš dávda maŋimuš 2,5 jagis.

Juovlaluopmu

Juovlamánu 18. beaivvi rájes váldá stáhta bivdojoavku luomu gitta ođđajagemánnui.

– Dat maiddái mearkkaša ahte gottit besset leat ráfis dan guokte juovlavahkku, dieđiha Birasdirektoráhtta.

Muohtaskohteriin ja helikopteriin fievrredit bivdiid, gávdnat gottiid ja fievrredit jápmán gorudiid. Báhčin dáhpáhuvvá nu ahte bivdi ii geavat mohtorvuodjenfievrru go njáhká lahka gotti.

Bistá gitta miessemánnui

Luonddubearráigeahču raportta dieđuid vuođul orrot gottit leat buori vuoimmis.

– Ealu reakšuvdna dieđusge molsašuvvá olu, muhto ollislaččat eai oro gottit nu árggit go álggos leimmet vuordán. Máŋgii gottit eai báhtar nu guhkás, ovdal go bisánit ja fas guohtugohtet maŋŋel go goddi lea báhččon, dadjá Prestrud.

Oktiibuot leat 30 olbmo geat barget goddebivdduin. Sii barge dan láhkai ahte álo leat logi olbmo bivdimin.

Maŋŋel juovlabottu álggahuvvo bivdu fas, ja galgá plána mielde bistit gitta miessemánnui.

(©NTB)