Vihtta jagi áigi ásahuvvui Návuona giellaguovddáš. Boahtte bearjadaga, juovlamánu 1. beaivvi, čalmmustahttojuvvo seminárain mii lea rabas buohkaide, mállásiin ja musihkain giellaguovddáža lanjain Sørstraumenis.
Duohtavuođa- ja seanadankommišuvnna mearkkašupmi giellaguovddážii ja suohkanii lea fáddán semináras.
– Kommišuvnna bargu fertejit gielddat čuovvolit. Sin barggut dat váikkuhit eanemusat olbmuid eallimii ja árgabeaivái, dadjá giellaguovddáža beaivválaš jođiheaddji, Karen Ellen Inga Eira.
Stuorradiggi nammadii kommišuvnna mii lea guorahallan Norgga politihka sámiid ja kvenaid ektui. Sin raporta lea 700 siidosaš. Dat biddjojuvvui ovdan ja sáddejuvvui gulaskuddamii mannan geasi.
Sátnejođiheaddji Kai Petter Johansen, sámediggeráđđi Mikkel Eskil Mikkelsen ja dutki Eva Josefsen leat mielde semináras.
Diibmu 16.00 rájes bovde guovddáš nuvttá mállásiidda. Dii. 18:00:s lea konsearta mas Simalango, Kristin Mellem, Eira Joavku, Ágy ja Ellen Oskal Spein čuojahit.
