Oallugat dárbbahit muhtuma geainna hupmet juovllaid- ja ođđabeaibasiid áigge ja oallugat muitalit oktonisvuođa birra, dieđiha Kirkens SOS.
Kirkens SOS fálaldat lei rabas olles juovla- ja ođđabeaibasiid, ja dieđihedje ge basiid gaskkas ahte ledje vástidan badjel 3000 ságastallama telefovnna ja interneahta bokte, ja čálalaš fálaldat čájehuvvui leat hui bivnnuhin.
Kirkens SOS čohkkii sullii 1000 eaktodáhtolačča dán bargui.
Oktiibuot jagis sis leat 200 000 ságastallama, ijabeaivvi, leaš dál árgabeaivi dahje luopmoáigi.
Kirkens SOS lea guhká leamaš riikka stuorámus heahtebálvalus telefovnnas ja interneahtas.
– Mii sávvat ahte mii nagodit addit doaivaga olbmuide geat vásihit hástalusaid eallimis. Jearakeahttá makkár sosiála dahje ekonomalaš duogáš lea, religiovdna- dahje seksuálasodju lea. Buohkat, geat váldet oktavuođa, besset leat anonymat ja min bargiin lea jávohisgeatnegasvuohta, čállá Kirkens SOS.
Eambbogat váldet oktavuođa čálalaččat
Sis leat fálaldagat dego soschat.no ja SOS-diehtu, gos sáhttet váldit oktavuođa singuin čálalaččat.
Dán guovtti fálaldaga bokte sis lea leamaš ságastallan eambbo go goasse ovdal.
– Mii vásihit ahte eambbo ja eambbo olbmot váldet oktavuođa minguin čálalaš bálvalusaid bokte, danne lea buorre ahte mii leat nagodan vástidit eambbogiid čálalaččat go mis leat eambbo bargit dál, lohká Kirkens SOS generálačálli Leif Jarle Theis.
Relašuvdnahástalusat lassánan
– Eatnasat geat váldet oktavuođa muitalit stuorra oktonasvuođa ja psyhkalašváttisvuođaid birra. Mii leat vásihan lassáneami ságastallamiin mat leat relašuvdnaváttisvuođaid birra, lohká Theis.
