Ráđđehus evttoha nannet barggu vai nuorat čađahit ja gárvejit joatkkaskuvlla, ja evttoha 300 miljovnna ruvnno dasa.
– Dát lea bušeahtta vai eambbosat besset bargui, ja mii vuoruhit nuoraid. Dál lea nu ahte guovttis juohke logát oahppis geargaba joatkkaskuvllas, muhto váilu fágareive dahje oahppoduođaštus. Sii rahčet de beassat bargui, ja servodat massá bargonávccaid. Dan dihte mii dál bargat dan ovdii ahte oahppit čađahit skuvlla, muitala oahppominister Tonje Brenna (Bb) preassadieđáhusas.
Golbma evttohusa
Ráđđehusas leat golbma evttohusa mo eambbosat čađahit joatkkaskuvlaoahpu.
Juohke jagi leat fidnofágaoahppit geat eai beasa bargohárjehallamii man dárbbašit čađahit, vai čađahit skuvlla. Ráđđehus evttoha ahte galget eambbo ruđa bidjat bargohárjehallansajiide. Sii evttohit lagabui 460 miljovnna ruvnno dasa, dat lea 80 miljovnna ruvnno eambbo go 2022:s.
Ráđđehus háliida nannet «Fágareivve barggu bokte» -ortnega. Dat ortnet galgá veahkkin rávisolbmuide beassat barggu bokte háhkat alcceseaset fágareivve. Dasa evttoha ráđđehus 60 miljovnna ruvnno, diibmá lei 46 miljovnna ruvnno.
Ráđđehus evttoha 61 miljovnna ruvnno ovddidit ođđa oahpahuslága. Láhkarievdadusat galget dahkat ahte eambbosat gárvejit ja čađahit joatkkaskuvlaoahpu.
