Sámediggeráđđi juolluda 300 000 ruvnno prošektii Romssa giellariššu, mii galgá nannet Romssa mánáidskuvlaohppiid sámegiela geavaheami.
Sámediggeráđđi juolluda 300 000 ruvnno prošektii Romssa giellariššu, mii galgá nannet Romssa mánáidskuvlaohppiid sámegiela geavaheami.
Jurdda giellarišuin lea čohkket mánáidskuvlaohppiid Romssa skuvllain geain lea sámegieloahpahus.
Sii galget deaivvadit golmma diibmui vahkkui, maid nuorra sámegielat rávisolbmot jođihit.
Dát lea olggobealde dábálaš oahpahusa, ja ulbmil lea ahte visot čađahuvvo sámegillii, dieđiha Sámediggi preassadieđáhusas.
– Buorre prošeakta
Sámediggepresideantta Aili Keskitalo mielas orru dát buorre prošeakta.
– Dát lea juoga ođas mii boahtá lassin dan dábálaš sámegieloahpahussii, ja mii nanne ohppiid sámegielmáhtu. Oahppit ožžot ná olu eanet áiggi ja vejolašvuođa sámástit, dadjá Keskitalo.
Romssa giellariššu lea Romssa suohkana ja UiT Norgga arktalaš universitehta ovttasbargu, ja Sámi váhnenfierpmádat doarju prošeavtta.
Dasa lea plánen oččodit sámegielat studeanttaid čađahit doaimmaid, ja sii fas ožžot gielladutkiin ja earáin bagadallama.
Dan doibmii lea maid ásahuvvon referánsajoavku mas leat earret eará gielladutkit geain leat vásáhusat revitaliserenbarggus iešguđet guovlluin Sámis.
– Prošeakta orru bures plánejuvvon, das leat buorit ovttasbargoguoimmit, ja orru nu ahte prošeavttas leat buorit vejolašvuođat lihkostuvvat. Lea maid buorre ahte prošeakta juogaduvvo earáiguin jus das leat buorit bohtosat, loahpaha Keskitalo.
