Sámediggeráđđi lea juolludan doarjaga guovtti musihkkaprošektii. Anonyma joavku TØNDRA pláne almmuhit ođđa skearru ja nubbi eará musihkkajoavku ges áigu almmuhit Simmona Máhte luđiid ja lávlagiid.
Sámi Musihkkafestivála vuođđudus lea ožžon 92 000 ruvnnu doarjaga ođđasis báddet luđiid ja lávlagiid maid Simmona Máhte dahje Mathis Simonsen Hætta rohkki ráhkadii. Báddemat leat digitála hámis. Emil Karlsen, Jan Ole Hermansen ja Dear Sara leat mielde musihkkaprošeavttas.
Permafrost Production oažžu ges 195 000 ruvnnu doarjaga buvttadit skearru elektronika-joavkkuin man namma lea TØNDRA. Dán anonyma joavkkus leat guokte čuojaheaddji ja soai viežžaba inspirašuvnna luođis ja sámi musihkas. TØNDRA mihttu lea olahit viidábut iežas musihkain, maiddái olgoriikkas.
– Sámi musihkkasuorggis leat dál ollu doaimmat. Sámi musihkkárat ja lávlut buvttadit musihka máŋgga šlájas dahje suorggis. Sámediggeráđi mielas lea buorre go musihkkasuorggis lea ná viidodat, sihke sámi klassihkkárat ja ođđamállet šuoŋat. Guktot prošeavttas, maidda juolludeimmet doarjaga, leat sihke ođđaáigásaš ja árbevirolaš musihkat, lohká sámediggeráđđi Maja Kristine Jåma (NSR) preassadieđáhusas.
Juolludeapmi addo juoigan ja sámi musihkka -doarjjaortnegis.
