Ohcanveahka lei juo ráhkkanišgoahtán ohcat sin.
Maŋŋi eahkeda distaga bođii politiijaide diehtu ahte 25 oahppi ja guokte oahpaheaddji ledje láhppon meahccái. Ávvira dieđuid mielde ledje sii Beaskáđás-guovllus Álttá ja Guovdageainnu suohkanráji birrasiin.
Oarje-Finnmárkku politiijaid dieđu mielde lei ohcanveahka juo ráhkkanišgoahtán ohcat dán joavkku. Muhto oahppit ja oahpaheaddjit deive fas geainnu ala, ja nu manai buot bures, muitalit politiijat.
Ávvira dieđuid mielde bohte oahppit ja oahpaheaddjit vulos luotta lusa Ávžejávregáddái Silisávžái.
Ášši ođastuvvo.
