Ruoŧas leat 25 gumppe báhččon dan njealji gumpeguovllus gos sáhttá daid bivdit.
Guokte maŋimuš gumppe goddojuvvojedje mannan sotnabeaivvi, čállá svt.se.
Sáhttet eambbo bivdinlobit addojuvvot
Muhto eambbo gumpebivdinlobit sáhttet addojuvvot guovvamánu 15. beaivvi go bivdoáigi nohká.
Bivdolobi addin lea addon diimmá jagi loguid mielde, muhto olu orru leat dáhpáhuvvan.
Eanet gumppet leat boahtán guvlui ja dat sáhttá váikkuhit ahte eanet gumpelobit addojuvvojit.
– Sáhttá šaddat nu, muhto dan mearridit Värmlándda ja Örebro leanahoavddat, čilge Fredrik Wilde, gii bearráigeahččá elliid dili Värmlándda leanastivrras.
Buot gumppiid, mat leat báhččon dán bivddus, galget leanastivrra áirasat fitnat dárkkisteamen.
Báhčči oažžu ieš gumppenáhki, muhto gorut sáddejuvvo Stáhta Veterinearamedisiinnalaš ásahussii gorutiskamii. Ulbmil lea kártet gumppiid dearvvašvuođadili, agi ja gos lea boahtán.
