– Jus dus leš miella oastit el-biilla mas eai leat divadat, de lea jagi 2022 jahki goas dan sáhtát dahkat, lohká NAF eiseválddiid gulahallanolmmoš Thor Egil Braadland. Son váruha ahte sáhtát dattetge šaddat máksit divada jus biila ii boađe du háldui ovdal go 2023:s.
Politihkkárat leat guhká háliidan bidjat divada divrasamos el-biillaide. NAF dahje Norgga automobiilalihttu eiseválddiid gulahallanolmmoš Thor Egil Braadland muitala ahte el-biilla haddái ii biddjo divat 2022:s, muhto biilaoasti ferte rehkenastit ahte ferte máksit divada go oastá el-biilla 2023 ođđajagemánu vuosttáš beaivvi rájes.
– Lasseárvodivat dahje momsa boahtá, muhto ii biddjo momsa luvvemis 25 prosentii ovtta jagis. Ráđđehus lea lohpidan ja dieđihan ahte ferte vuordit at el-biillaide, mat mákset eanet go 600 000 kruvnna, biddjo lasseárvodivat, lohká Thor Egil Braadland preassadieđáhusas.
Braadland váruha ahte momsanjuolggadusat bohtet fápmui go mávssát dan el-biilla, iige go tiŋgot dan. Son rávve olbmuid geat tiŋgojit ođđa biilla geavahit biilasuorggi stándardasoahpamuša mii addá oastái vuoigatvuođa hilgut dan biilaoastima jus haddegoargŋun oktiibuot lea stuorát go guhtta proseantta.
