Okta nuoraidskuvlaluohkká ja okta joatkkaskuvlaluohkká Porsáŋggus leat biddjon erremii.
Koronanjoammuma geažil lea Porsáŋggu gieldda gearggusvuođajođiheapmi sotnabeaieahket doallan čoahkkima ja mearridan ahte guokte skuvlaluohká biddjojit erremii.
– Mánnodaga bođii nuorra rávisolmmoš girdi mielde Oslos Levdnjii. Son oaččui lávvordaga duođaštuvvot ahte sutnje lea njommon koronavirus covid-19. Son lea dál isolašuvnnas ruovttus, ja su lagasoktavuođat leat biddjon erremii. Olbmot geaiguin sus lea leamašan lagas oktavuohta galget ihttin, mánnodaga, váldit koronaiskosa, čilge gielda preassadieđáhusas sotnabeaieahket.
Dan geažil lea gieldda gearggusvuođajođiheapmi mearridan ahte Leavnnja nuoraidskuvlla 10B luohkká ja joatkkaskuvlaluohkká JO-1 oahppospesialiseren biddjojit erremii áigodaga 19.03.21-29.03.21.
Gielda ávžžuha olbmuid váldit oktavuođa dearvvašvuođabálvalusain jus leat veaháš ge dávdamearkkat.
