Politiijat leat aiddobeliid gávdnan 19-jahkásaš gándda, guhte iđđes lea leamaš jávkosis Riehppovuonas.
Politiijat leat aiddobeliid gávdnan 19-jahkásaš gándda, guhte iđđes lea leamaš jávkosis Riehppovuonas.
OĐASTUVVON DII. 13.20: Oarje-Finnmárkku politiijat dieđihit iežaset čađahan ohcanakšuvnna odne iđđes, go ožžo dieđu ahte muhtin 19-jahkásaš gánda lei jávkan maŋŋil go mannan ija dahje odne iđđes, lei suhkalan fatnasiin Mohkkis, Riehppovuonas.
Oarje-Finnmárkku politiijaguovllu operašunjođiheaddji Leif Magne Thomassen muitala gándda bearraša iđđes dieđihan politiijaide ahte gánda lea suhkalan rukses plástafatnasiin mannan ija, dahje odne iđđes.
Eai fáhten ságaide
Oapmahaččat eai lean fáhten gándda ságaide ja ledje maiddái geahččalan biillain vuodjit gitta Fálesnuoris aican dihte fatnasa.
– Dát lea dakkár fanas mii govdu vaikke mo de livččii nu ahte dan oainnášii de mearas. Mii mearrideimmet de bidjat johtui ohcanakšuvnna ja sáddiimet maid gádjunhelikoptera báikái, čilge Thomassen.
Veaháš ovdalaš go gádjunhelikopter joavddai báikái de ožžo politiijat dieđu ahte muhtin báikkálaš olmmoš lei gávdnan gándda fiervvás Veaiggesvuonas.
– Gánda lea njuoskan ja oalle ládje galbmon. Dearvvašvuođabargit leat dikšumin su dál, muitala Thomassen Ávvirii.
Politiijat eai loga diehtit manne gánda lei suhkalan, muhto navdet albmá leamaš oaggumin.
iFinnmark dieđuid mielde galgá gánda leat rievdan fatnasiin gáddái.
– Son lei mannamin meara ala bivdit, muhto de besse ákŋomuorat fatnasis iige almmái nagodan suhkat šat. Biekkastii ja šattai váttis stivret fatnasa nu son loahpas rievddai Veaiggesvuona fiervái, dadjá Oarje-Finnmárkku politiijaguovllu operašunjođiheaddji Leif Magne Thomassen, iFinnmarkii.
Politiijat eai dieđe man guhká gánda lea leamaš meara alde, muhto lohket su geahččalan riŋget iežas áhččái viđa áigge iđđes, dan mielde jáhkket albmá leamaš ainjuo dan rájes meara alde.
