Sámediggi juolluda 166 000 ruvnno doarjjan ođasmahttit ja stuoridit Løvli Eiendom AS dálá lanjaid Gáivuonas.
– Dát doaibma lei álgoálggus ovttaolbmofitnodat. 2021 geasi mearridii son doaimma organisašuvnna rievdadit. Son vuođđudii sierra fitnodaga mii eaiggáduššá viessosaji mas doaibma lea. Dasa lassin vuođđudii doaibmafitnodaga; Løvli Naturull AS. Løvli Naturull AS dat lea fitnodaga mohtor mii doalvu fitnodaga ovddas guvlui. Sii leat áidna láigoheaddji ja Løvli Naturull AS háhká dietnasa goappašiid fitnodagaide, čállá Sámediggi preassadieđáhusas.
Sin buvttadanproseassas lea ullu vuolggasadjin. Das buvttadit iešguđetlágan ullobuktagiid. Viesu ođasmahttit sáhttá dahkat bargoproseassaid njuovžileabbon ja dien láhkai sáhttet lasi buvttadit.
– Sámediggi lea ilus go sáhttet juolludit doarjaga seailluhit ovddeš árbemáhttu, ja dáinna máhtuin ovdánahttit ja ráhkadit gelddolaš buktagiid, lohká Sámediggeráđđi Hans Ole Eira.
