Go áigemearri čállingilvui dievai, de ledje 16 novealla boahtán, čállon sihke davvi- ja julevsámegillii.
Ávvir ja Tjállegoahte girjjálašvuođaguovddáš ovttasbarget čállingilvvu lágidemiin. Noveallagilvvus lea fáddá «Ráhkisvuohta Sámis – Gieresvuohta Sámen – Gieriesvoete Saepmesne», ja dasa beassá searvat golmma sámegillii.
Áigemearri searvat gilvui lei ođđajagimánu maŋemus beaivvi.
Máŋga novealla mielde gilvvus
Tjállegoahte jođiheaddji, Lea Simma, muitala ahte 16 novealla leat boahtán áigemearrái ja lea hui duđavaš dainna.
– Dat lea somá ahte bohte dán mađe olu čállosat. Lea maid hui somá go lea beroštupmi, dadjá son.
Simma muitala ahte okta novealla lea čállon julevsámegillii, ja reasta fas davvisámegillii.
– Dál in leat háhppehan eará geahčestit jođánit daid noveallaid. Šaddá somá lohkat daid ja oaidnit mat doppe leat boahtán.
Čiegus oassálastit juryláhttuide
Maiddái Ávvira váldodoaimmaheaddji, Kari Lisbeth Hermansen, lea duđavaš dainna 16 noveallain.
– Mii leat hui duđavaččat go dat lea olu go jurddaša dá lea čállingilvu mas galgá sámegillii čállit. Erenoamáš suohtas maid go julevsámegillii lea boahtán novealla, dadjá son.
Oassálastiid ii beasa diehtit ovdal go vuoitit nammaduvvojit ja nu ii dieđe kártet gos Sámis čállit orrot.
– Mun sávan ahte leat viidát Sámis boahtán noveallat go mii eat dieđe geat leat čállán ja gos leat sáddejuvvon ovdal go vuoiti nammaduvvo, go mis lea bargi juryláhttu. Sávvat maid ahte leat sihke nuorra čállit ja maid hárjánan čállit.
Ilbma ráhkisvuođa podcast noveallaid oktavuođas
Go vuoitit leat nammaduvvon de besset Ávvira lohkkit gullat buot noveallaid.
– Min lohkkit besset sihke lohkat ja gullat daid go jurdda lea ráhkadit girjjálašvuođa podcasta gosa dát noveallat lohkkojit ja beassa de doppe daid guldalit, lohká Hermansen.
Goas dát podcast ilbma ii leat vuos čielggas.
– Dát ii dieđusge šatta ovdal go jury lea lohkan buot ja nammadan vuitiid. Árvidan dat lea váttis bargu ja danne sáhttet ádjánit dainna veaháš. Mihttu lea ahte buot noveallat bohtet podcast hápmin. Nu ahte de šaddá dakkár ráhkisvuođa podda, go mii han leat hástalan čállit noveallaid main lea ráhkisvuođafáddá. Dál eat sáhte vuos dadjat goas leat gergosat almmuhit daid, go lea áddjás bargu ja seammás ferte vuđolaččat bargat vai šaddá rehálaš válljen, dadjá Ávvira váldodoaimmaheaddji, Kari Lisbeth Hermansen.
Gearggus árvvoštallat
Ávvira prošeaktajođiheaddji, Elin Marakatt, illuda árvvoštallat noveallaid
– Dat lea hirbmat somá go bohte nu olu noveallat ja mun illudan lohkat, árvvoštallat ja mearridit vuitiid, dadjá son.
Maiddái son lea ovttaoaivilis ahte lei somá go maiddái julevsámegillii lea soames čállán, muhto somá maid go nu oallugat leat searvan. Son vuohttá beroštumi dasa.
– Mearkkaša ahte oallugiin lea beroštupmi čállit dáppe sámis, dadjá Marakatt.
Noveallagilvvu vuoiti oažžu 10 000 ruvnno, nubbin oažžu 5 000 ruvnno ja goalmmádin ges 3 000 ruvnno.
