Measta guhtta politiija logi politiijas leat árvvoštallan heaitit politiijan maŋimuš guovtti jagis. Sivvan leat earret eará lassánan bargonoađđi, resursavátnivuohta ja vuollegis bálká.
Leat unnimusat Finnmárkkus geat árvvoštallet heaitit. Eanemusat leat Trøndelágas ja Agderis.
Measta golmmas njealji politiijabargis dadjet ahte bargonoađđi lea sturron – ja dadjet dat lea okta sivva:
«Barggut lassánit ja lassánit ja lassánit. Mu bargonoađđi lea nu stuoris ahte dat čuohcá dearvvašvuhtii. Mun […] vásihan beaivválaččat resursavátnivuođa. Mii álgit 100 diŋggain, ja loahpahit dušše moadde», muitala bargi gii árvvoštallá heaitit.
– Dat lea dakkár ovdáneapmi mii duođaid bohciidahttá vuorjašumi, ja dat deattuha man dehálaš lea čielggadit barggu rámmaid, nu ahte sii geat čađahit barggu, sáhttet guhkit áiggi bargat, dadjá politiijaid váldesuodjalusáittardeaddji Audun Buseth.
