Gaskamearálaččat jápmet 900 olbmo Norggas jahkásaččat golgodávdda geažil. Dál ávžžuhuvvojit beannot miljovnna olbmo váldit influensaboahku eastadan dihtii dávddaid ja jápmima.
Gaskamearálaččat jápmet 900 olbmo Norggas jahkásaččat golgodávdda geažil. Dál ávžžuhuvvojit beannot miljovnna olbmo váldit influensaboahku eastadan dihtii dávddaid ja jápmima.
Olbmot geat gullet riskajovkui ávžžuhuvvojit dál boahkuhit iežaset golgodávdda vuostá.
– Golgodávdda geažil sáhttet olbmot earret eará buohccát geahpesboalddáhagain, dahje kronalaš dávddat sáhttet vearránit, čállá Álbmotdearvvašvuođainstituhtta ja ávžžuha lagabui beannot miljovnna norgalačča boahkuhit iežaset.
Influeansaboahkuheapmi sáhttá eastadit buozalmasvuođa ja jápmima, gaskamearálaččat oainnat jápmet 900 olbmo Norggas golgodávdii juohke jagi.
Riskajoavkkut
Áhpehis nissonat, boarrásiidsiiddaid ássit ja buohkat geat leat deavdán 65 jagi ávžžuhuvvojit boahkuheami váldit.
Sihke mánát ja ollesolbmot geain lea sohkardávda, kronalaš vuoiŋŋahatbohccedávddat, váibmo- ja varrasuotnavigit, vuoivvas ja monindávddat, kronalaš nevrologalaš dávddat dahje vigit, heajos immunasuodji ja buidodat berrejit maiddái boahkuhuvvot.
Dasa lassin berrejit olbmot, geain leat eará kronalaš dahje duođalaš dávddat, jearrat doaktáriin berrejit go váldit influeansaboahku.
Dearvvašvuođabargit
Álbmotdearvvašvuođainstituhtta ávžžuha maiddái dearvvašvuođasuorggi bargiid iežaset boahkuhit jus sis lea pasieantaoktavuohta.
Dasa lassin ávžžuhuvvojit sii boahkuhuvvot geat ovttastallet olbmuiguin geain lea heajos immunasuodji.
Spiidneboanddat ja earát geat barget ealli spiinniiguin berrejit maid boahkuhit iežaset.
Sámi gielddat leat boahkuhišgoahtán olbmuid ja sin neahttasiidduin gávnnat eanet dieđuid goas heive boahtit boahkuhit iežas.
