Fylkkaráđđi pláne boahtte njealji jagi áigodagas geavahit 13 miljárdda ruvnnu johtalussii. Lagabui 10 miljárdda doibmii, ja badjelaš 3 miljárdda investeremii.
Romssa ja Finnmárkku fylkkagieldda fylkkaráđđi lea dál buktán ovdan iežaset árvalusa johtalusbušehttii ovddasguvlui gitta 2024 rádjái. Doaibmaprográmma mii čilge vuoruhemiid bušeahttaáigodagas galgá veahkehit sihke sihkkarastit beassama ja váldit vára dálá infrastruktuvrras, čuožžu preassadieđáhusas.
– Dasa lassin ahte hukset ođđa, de lea seamma dehálaš váldit vára infrastruktuvrras mii mis juo lea. Boahtte njealji jagi áigodagas galget fylkkageainnut, šalddit ja tunneallat sihkkarastojuvvot ja ođasmahttot, dadjá johtalusa fylkkaráđđi, Kristina Hansen (Bb).
