Unjárgga ovddeš suohkanbáhppa Petra Cordula Lihl lohká dál lea áigi diktit juoigat girkuin.
Unjárgga ovddeš suohkanbáhppa Petra Cordula Lihl lohká dál lea áigi diktit juoigat girkuin.
Petra Cordula Lihl, boahtá Duiskkas gos jodlen lea oassi girkus, leaš dál katolihkka vai protestánta.
NRK Sápmái dadjá son ahte lea jallodat go juoigan adno suddun girkus.
– Dat ii galgga leat suddu, muhto kultuvra man lea dehálaš ovddidit, dadjá son. Su mielas dárbbašuvvo ođasmahttin girkuin dán áššis, ja ávžžuha searvegottiid váldit luođi atnui girkus.
– Váttisvuohta lea boarrásit buolvvas, go sii leat gullan ahte ii lean lohpi juoigat. Nuorain ii leat diet váttisvuohta, dadjá son NRKii.
Finnmárkkus konservatiivat
Šattai riedja Guovdageainnus guokte jagi áigi, go dovddus norgalaš trompehtačuojaheaddji Ole Edvard Antonsen juoiggastii girkokonsearttastis. Dat dagahii digaštallamiid man muddui iešguđet searvegottit Finnmárkkus dohkkehedje luođi girkuin. Lulli-Sámis eai oainne sápmelaččat váttisvuohtan ahte juoiget girkus.
Ieža mearridit
Religiovdnahistorihkkár Brita Pollan muitala NRKii ahte ovdalaš áiggi geavahedje luođi hástalit jábmiid ja danne lei gildojuvvon geavahit dakkár fámuid. Son ii doarjjo gal ahte galgá bágget luođi váldit girkui.
– In doarjjo ahte galggašii bágget ođasmahttit dán oainnu. Mu mielas galgá váldit vuhtii makkár dovddut leat searvegottis dán gažaldahkii. Dás ii leat sáhka ođasmahttimis obage, dadjá Pollan.
