Yle Sámis bidjet návccaid sosiála mediaid geavaheapmái

Suoma bealde juohke jagi tv-ođđasat mannet geasseboddui dan eai daga Norgga- ja Ruoŧa bealde tv-ođđasat .

– Dat lea juohke jagi leamašan dan rájes go Supmii bohte sámi tv-ođđasat. Ferte measta Helssegis jearrat manne dat eai sáddejuvvo oanehis ođđasat, čilge Yle Sápmi doaimmahusa hoavda Pirita Näkkäläjärvi

Ođasmahttimat

Yle Sámis eai loga dainna heađástuvvat ollu go besset ge eará prošeavttaid geahččaladdat dan bottá go eai sáddejuvvo oanehis tv-ođđasat.

– Mis leat guokte ođasmahttin prošeavtta, geahččaladdan prošeavtta. Go eai boađe tv-ođđasat de mii ráhkadit videoid sosiála mediaide, Facebookii. Galgat boahtte vahkus dan geahččalit oanehis videoid.

Maiddái háliidit bidjet deattu dan geasi guhkebuš čállosiida dahje journalista fágagiela mielde feature áššiid maid buvttadit neahttasiidui. Dása lassin Yle Sámis lohket bargagoahtit atnimis Snapchat nammasaš sosiála media.

– Dan dihte go sámegiella gullo ja oidno eandalii Suoma beale sámi servodagas oalle unnan. Ja dat lea ođđa innovatiiva vuohki čalmmustahttit sámegiela. Facebook ja snapchat lea okta vuohki mo sáhtit dan dahkat. Maiddái doppe leat nuorat. Dohko dasto mii galgat mannat vai joksat nuoraid.

Oahpes fálaldagat ja ollu geassebargit

Pirita Näkkäläjärvi ii čiega áigumušaid seammás ge lohká Yle Sápmi doallá ge dan mii lea oahpes sin guldaleddjiide.

– Muđui mis lea geasseáiggi neahtta ja geasserádio fálaldagat. Geasserádio sáddejuvvo juohke beaivvi golbma sámegillii. Seammá sáddagis gullo golbma sámegiella ge: davvi-, nuortta- ja anársámegiela.

Näkkäläjärvi muitala ahte ii goassige ovdal ledje nu oallugat ohcan geassebarggu Yle Sápmái. Oktiibuot Yle Sámi doaimmahusas leat 20 bargi dain 8:s leat geassebargi.

– Giđat mis lei dilli go váilo bargit. Muhtun gaska mis ledje hui unnán bargit. Mis sesttui ruhta ja dál ges sáhttit váldit eambbo geassebargiid.

Sámi tv-ođđasat oidnogohtet Suoma bealde fas čakčat 22.8.2016 rájes.