Vurdet jođihit eanet ovdagihtii bileahtaid

Buvttadeaddji Oula Guttorm lohká dáhpin leamaš ahte eanas guossit ostet uvssas, ja uhcit ovdagihtii. Son goitge vuordá ahte dan jagi olahit ođđa gehččiidolahusa.

 – Diibmá olles vahkoloahpas fitne 2900 olbmo, ja go feastivála lea sturron jagis jahkái, de dieđusge vuordit ja sávvat nu joatká. Jon Henrik Fjällgrena konseartta bileahtat bearjadaga vuvdojuvvojit sierra, ja dasa leat beare rájálaš mearri bileahta. Bileahtaid sáhttá oastit uvssas jos dat leat báhcán vuovddekeahttá.

 – Fjällgren konsertii jáhkán ahte mii vuovdit eanet bileahtaid ovdagihtii, lohká Guttorm.

Bileahtaid sáhttá oastit ovddalgihtii Sámi kulturguovddáš Sajosa infos ja Lipputoimisto doaibmasajiin dahje diŋgot čujuhusas www.lipputoimisto.fi. Feastiválalágideaddjit ávžžuhit olbmuid oahpásmuvat rávvagiidda ovdal bileahtaid diŋgoma.

Lávvardaga borgemánu 15. beaivvi festiválagiehtabáddi rávesolbmuide máksá ovddalgihtii 30 euro ja mánáide (4-12 –jahkásaččat) 20 euro. Vuollái 4-jahkásaččaide lea nuvttá sisabeassan. Uvssas festiválagiehtabátti haddi rávesolbmuide lea 35 euro ja mánáide fas 25 euro.

Dan jagi Ijahis ija prográmma lea viidásut go goassige ovdal. Dáhpáhus álgá juo duorastaga 13.8. Inger-Mari Aikio mánáid skearru “Ima Mánážat” almmustahttinkonsearttain. Bearjadatiđit álgá mánáid- ja nuoraidprográmmain ja eahkedis ruoŧasápmelaš Jon Henrik Fjällgren, Sámi ođđasamos stuorrá násti, loaiddasta Sajosa auditorios. Bearjadateahkeda loahpaha Johtti-klubba.  Musihkas vástidit earret eará UMK-gilvvus dovdosat Hildá Länsman ja DJ Eeverest.

Lávvardatbeaivvi 15.8. álggaha musihkkaseminára Sámemusea Siiddas. Eahketbeaivvis prográmma joatkašuvvá Arvvas-joavkku konsearttain Sajosa auditorios dmu. 16.00. Dan maŋŋá álgá Ijahis ija váldokonsearta Sajosa šiljus. Konsearttas loaiddastit earret eará Wimme ja Arctic Talent –bálkkašumi vuoiti Elle Márjá Eira musihka joavkkuinis.