Vuosttaš sihkkeltrimmas 1979:s lei dušše okta vuoitu, okta sihkkel. – Sihkkel ain manná, muitala vuoiti Solveig Hætta.
Vuosttaš sihkkeltrimmas 1979:s lei dušše okta vuoitu, okta sihkkel. – Sihkkel ain manná, muitala vuoiti Solveig Hætta.
39. sihkkeltrimma lágiduvvui dan sotnabeaivvi Guovdageainnus. Sihkkeltrimma lea bures sajáiduvvan gilvu, ja dán jagi ledje maid olbmot vuolgán lášmmohallat ja ovttastallat earáiguin. Fiertu ja veaháš biegga, juste buoremus dálki vai ii šatta nu báhkka lášmmohallat.
– Ain nu buorre
Vuosttaš Sihkkeltrimma lágiduvvui 1979:s, dalle ledje čuođi oasseváldi ja lei dušše okta sihkkel vuoitun. Dan sihkkela vuittii Solveig Hætta, ja buohkat geat Guohcamohkis finadedje besse oaidnit dan sihkkela.
– Muittán vuosttaš Sihkkeltrimma, dalle lei vuolgga seamma sajis go dál lea, ja manai veahá dobbelii Soahtefielmmá. Dalle lei dušše sihkkelgilvu, mus lei vuolgganummar 13, ja dainna vuiten sihkkela. Sihkkel lea ain nu buorre, manná dego!
– Lea ovdánan oba ládje, jáhkán lea leamaš oasseváldi olahus nuppelohkái čuođi. Jáhkán dát lea bures sajáiduvvan, olbmot dihtet juohke jagi ahte dán mutto dat lea, ja de sii vulget, juogo vázzit dahje sihkkelastit. Dál lei vel nu jalla fiinna dálki, lohká Hætta.
Ođđa lágideaddjit
– Diibmá serve oktiibuot 725 olbmo, ja dán jagi lei mihttu olahit juobe dan ge. Lea hui dávjá dálki mii mearrida. Iđđes lei veaháš čoaskkis, muhto dál lea beaivvádat ja veahá biegga, ja olbmot bohte, lohká Triumf.
Anni-Rauna Triumf lea Guovdageainnu Mohtorsearvvi jođiheaddji, ja searvi leat vuohččan lágideame Sihkkeltrimma. Guovdageainnu Sportskytterklubb lea maŋemuš 36 jagi lágidan Sihkkeltrimma, dassážii go árabut dán jagi mearridedje ahte eai váldde šat dan barggu.
– Leat oalle stuora skuovat maid galgat deavdit, Sportskytterklubba leat guhká lágidan, sii leat bures lágidan. Lea mannan bures, ja lean duhtavaš, lohká Anni-Rauna.
– Deháleamos seailluhit
Mohtorsearvvis eai leat vuos mearridan áigot go juohke jagi lágidit Sihkkeltrimma, dál sii leat vuos geahččaleame.
– Deháleamos lei seailluhit Sihkkeltrimma. Jurddašeimmet ahte lea vierru mii min mielas goit lea hui somá. Dáppe leat vaikke man agi olbmot, lea lšámmohallan, ii ge mihkke gilvvuid, lohká mohtorsearvvi jođiheaddji.
(Ášši joatká gova vuolábealde)
Buot bileahttadienas manná sihkkeliid oastimii. Dasa lassin leat lágideaddjit ožžon olu skeaŋkkaid servviin ja fitnodagain maid vuorbádit oasseváldiid gaskkas.
Lea maid sierra vuoitu nuoramus ja boarráseamos oasseváldái, sutnje gii ovddemus vulggii ja sutnje gii eanemus háviid searvvai. Vuorbádeapmi lea gaskavahkku.
– Go olu leat skeŋken, dat movttiidahtti, go dat čájeha ahte sii háliidit bisuhit sihkkeltrimma, lohká Anni-Rauna Triumf.
