Mannan bearjadaga lea Johttisápmelaččaid Listu doallan nammadančoahkkima Ávjovári válgabiirres.
Fávrrosordda orohaga Berit Marie P.E. Eira lea nammaduvvon vuosttaš sadjái.
– Dat lea hui stuora gudni, ja lea gelddolaš bargat válggaiguin. Lean leamaš guhká mielde várrelahttun, muhto dál lean vuosttaš geardde sihkkaris sajis. Lea maid vuosttaš geardde go Johttisápmelaččaid Listtus lea nissonolmmoš bajimusas, ja dat lea veaháš erenoamáš, lohká Eira.
Kárášjohkalaš nubbin listtus
Eira muitala sin nammadanlávdegoddi lea mearridan ahte nuppi sajis listtus galgá Kárášjoga beale olmmoš, iige nu movt lei mannan válggain, go ledje guokte Guovdageainnu beale olbmo bajimusas.
Nu válljejuvvui ge Anders Somby jr. nubbin sadjái listtus.
– Mis leat maid ovttamađe áirasat listtus Guovdageainnu ja Kárašjoga bealde, ja lea čorgadeamos nu, lohká Eira.
