Dievdu dubmejuvvui go galgá veahkaváldán máŋga nissonolbmo.
Dievdu dubmejuvvui go galgá veahkaváldán máŋga nissonolbmo.
Sálttu diggegoddi dubmii 40-jahkásaš dievddu viđa jahkái ja guđa mánnui giddagassii. Divttasvuotnalaš galgá veahkaváldán vihtta nissonolbmo.
Dievdu guoddala duomu.
Dievdu ii lean vuordán dákkár duomu
Diggi ja duopmu lea vuosttaš olu áššiin, mat álggahuvvojedje go 11 divttasvuotnalačča muitaledje iežaset muitalusaid VG aviisii diibmá.
Dievddu bealušteaddji Tarjei Ræder Breivoll lohká NTB:i ahte dievdu ii lean vuordán dán duomu.
– Vaikke diggegoddi lea muhtun muddui miehtan dievddu mearkkašumiide, de lea dievdu hirpmahuvvan go lea dubmehallan, ja ráŋggáštusmihtideamis. Son lea čielggas ahte oasit duomus, dahje olles duopmu guoddaluvvo.
Áktor duhtaváš
Áktor Jorild Steindal lohká NRK:i ahte lea duhtavaš duomuin, muhto ahte muhtun osiin ii leat ovttaoaivilis diggegottiin.
– Obbalaččat lea diggegoddi deattuhan seamma osiid go áššáskuhttineiseválddit. Leat muhtun erohusat, muhto obbalaččat leat ovttaoaivilis, lohká Steindal.
Diggegoddi deattuhii ahte sihke dievdu ja máŋggas gillájeddjiin ledje hearkkes dilis. Sii goit ge deattuhedje ahte gillájeaddjit ledje rašit dilis go dievdu.
Okta nissonolbmuin lea psyhkalaš doaimmashehttejuvvon, ja dievdu galgá dan atnán alcces ávkin.
– Dievdu lea čuoččuhan ahte sus leat erenoamáš attáldagat, ja sáhttá gulahallat jápmán olbmuiguin, ja dikšut vigiid. Dievdu lea rávisolmmoš, ja lea atnán dan ovdamunnin, čállá Sálttu diggegoddi.
Noaidi
Dievdu lea olu bargguid bargan noaidin, ja lea almmuhan ahte son sáhttá bahávuoiŋŋaid váldit eret. Dikkis son čilgii ahte son fuomášii mánnán juo daid attáldagaid.
Áššáskuhtton dievdu lea čađat gaskka biehttalan vearredaguid. Son lea čilgen ahte lei iešdáhtolaš seksuála ovttastallan, dahje ahte veahkaváldin ii leat dáhpáhuvvan.
Dievdu lei áššáskuhtton go galgá veahkaváldán guhtta nissonolbmo, muhto okta dain áššiin heaittihuvvui go eai lean doarvái duođaštusat.
Son dubmehalai daid earáid dihte, ja šaddá máksit buhtadusa nissonolbmuide. Supmit leat gaskal 25 000 ruvnno ja 185 000 ruvnno.
– Buorre go jáhkket
Veahkkeadvokáhtta Eirik Teigstad lea ovddastan ovtta nissonolbmo gii lei 16 jagi boaris go dáhpáhus geavai, čakčamánu 2014.
Nieida lei bivdán veahki bahávuoiŋŋaid oažžut eret su ásodagas. Dievdu oaččui nieidda nuoladit ja čárvvui su.
– Nieida lea duhtavaš duomuin, sutnje lei buorre oažžut duomu, ja oaidnit ahte diggegoddi jáhkii sutnje. Ádjánii oalle guhká ovdal go duopmu bođii, ja lei hástaleaddji vuordit, lohká Teigstad NTBii.
Seksuála veagalváldimat galget dáhpáhuvvan miehtá riikka, Lulli-Norggas gitta Divttasvutnii ja Bådåddjui. Doppe son orui orrunbiillas ovtta gaskka.
