Norgga Sámiid Riikasearvi (NSR) ja Bargiidbellodat (Ap) leat olahan ovttaoaivilvuođa Sámedikki reviderejuvvon bušeahtas mii lea áššin Sámedikkis boahtte vahkku.
Dál áigot dát guokte bellodaga juolludit lassin 5,2 milliuvnna ruvnno Tråante 2017 doaluide ja guokte milliuvnna ruvnno oastit John Savio dáidaga.
Savio dáiddačoakkáldat measta áibbas ollis
Áššejođiheaddji ja plána- ja finánsalávdegotti jođiheaddji Kirsti Guvsám (NSR) ja Suoivvaáššejođiheaddji ja nubbinjođiheaddji Ronny Wilhelmsen (Ap) lohkába dehálažžan oastit John Savio dáidaga.
– Mii áigut juolludit guokte milliuvnna ruvnno Deanu ja Várjjaga museasiidii geat jođihit Saviomusea. Sii galget oastit Niels Christian Bang Savio-čoakkáldaga mas leat badjel 400 Savio-barggu. Dat mielddisbuktá ahte Saviomusea lea measta áibbas ollis Savio gráfalaš bargguiguin. Dát lea dehálaš, ja mii háliidit veahkehit. Savio-dáidda gullá sámiid hálddašeapmái, ja dát doarjja lea veahkkin ahte dáidda šaddá oassin sámiid eaiggátvuođas, muitala Ronny Wilhelmsen.
Dehálaš vuoruhit Tråante
Guvsám ja Wilhelmsen oaivvildeaba dehálažžan vuoruhit Tråante 2017 doaluid.
– Mii leat hui ilus go sáhttit váikkuhit nu ahte Tråante 2017 šaddá ávvudeapmi olles sámi álbmogii, ja áigut 2016 bušeahta bokte juolludit 5,8 milliuvnna ruvnno Tråante 2017ii. Reviderejuvvon našunálabušeahta bokte lea 4 milliuvnna dán supmis jo juolluduvvon. Dat lea dehálaš doalut, muitala Guvsám ja joatká:
– Mii addit 1,2 milliuvnna Beaivváš Sámi Našunálateáhterii plánenbarggu ovddas ja go čađahit ávvučájálmasa «The Yoik Concert: Eallin mokta – Jielemen aavoe». Čájálmas galgá čájehuvvot Troandimis, ja mii illudit dán čájálmassii ja ávvudoaluide Troandimis guovvamánu 2017.
Ávvudit miehtá sámi olles jagi
– Historjjálaš heajos juolludemiid sámi ulbmiliidda mat leat dán jagi leamaš, de leat mii aŋkke duhtavaččat go ávvudoalut ožžot nanu doarjaga. Moai áigo maid namuhit ahte Sámedikki bušeahtas 2017 ovddas, leat eanet ortnegat main sáhttá ohcat doarjaga prošeavttaide Tråante 2017 oktavuođas, dadjába Guvsám ja Wilhelmsen preassadieđáhusas ja sávvaba ahte 100-jagi ávvudeamit galget čađahuvvot miehtá sámi – olles jagi badjel.
Geassemánu 8.beaivvi galgá reviderejuvvon bušeahtta gieđahallot Sámedikkis.
