Guovdageainnu mánát leat oahpásmuvvan sámi máidnasiidda teáhterprošeavtta bokte. Dál háliidit oahpahit máhtuset earáide ja danin bovdejit olbmuid «Máinnasbálgá» olgočájálmassii.
Guovdageainnu mánát leat oahpásmuvvan sámi máidnasiidda teáhterprošeavtta bokte. Dál háliidit oahpahit máhtuset earáide ja danin bovdejit olbmuid «Máinnasbálgá» olgočájálmassii.
Guovdageainnu kulturskuvla ja Giellagiisá leat čađahan «máinnasbálggis» nammasaš teáhterprošeavtta.
Mánát leat oahpásmuvvan sámi máidnasiidda ja dan vuođul leat ráhkadan čájálmasa.
Máinnasbálgás deaivvadit mánát ja nuorat sámi máidnasiid soaiggus fuođđuiguin nu go mat čáhcerávggain, gieddegašáhkuin, ulddain ja stáluin.
Juohke fuođđu luhtte lea mánáide doaimmat maid galget čoavdit ovdal go besset viidáset.
Giellaovdánahttin
Teáhterkurssa oasseváldit leat vuosttažettiin ieža beassan oahpásmuvvat máidnasiidda, ja dál go čájehit čájálmasa, de besset maiddái eará mánát ja rávisolbmot oaidnit ja oahppat das.
– Ulbmilin dáinna prošeavttain leamaš mánáid ja nuoraid giela riggudahttit ja ovdánahttit njálmmálaš doaimmaid ja máinnasteami bokte, čállá Guovdageainnu kulturskuvla preassadieđáhusas.
Buohkaid várás
«Máinnasbálggis» čájehuvvo Guovdageainnu gilišilju 30-jagi ávvudeami oktavuođas.
Čájálmas lea buohkaid várás ja čájehuvvo Gilišiljus duorastaga juovlamánu 14. beaivvi diibmu 18:00 ja 19:00.
«Máinnasbálggis» lea Guovdageainnu Gilišilju – Riddo Duottar Musea, Guovdageainnu kulturskuvlla ja Giellagiissá ovttasbargu.
