Dán jagáš Kara-X meašttirin šattai Áltálaš Martin Moland (19). Dasa lassin vuittii son «Pro Stock» luohkká ja bođii nubbin «Pro Open» luohkkás.
Moland faskiige váldovuoitu «Rievvárheatas» mii lei 20 000 ruvnnu ja 5000 ruvnnu eará luohkáin.
Duorastaga vuittiiges Ruoŧas Kalixas, mas lei vuosttaš vuoitu 30 000 ruoŧa ruvnnu.
Guovdageainnusges ii lohkan lihkostuvvan nu bures, go lei beare duolbbas gilvošilljus ja buoremus sadji lei goalmmát.
– Mun liikon ollu buoret dákkár šiljuid, gos leat ollu njuikehagat ja leat veahá eambo hástalusat. De lihkostuvan buorebut, čilge dán jagáš Rievvár.
«Rievvárheatas» bođii nubbin Marius G Nord ja goalmmádin bođii suopmelaš Aki Pihlaja.
Unnit geahččit
Kárášjoga Mohtorsearvvi jođiheaddji Per Tommy Solbakken lei duhtavaš gilvvuin, vaikko eai dán jagi lean geasuhan nu ollu vuddjiid go diibmá. Geahččitge ledje unnit diimmá ektui.
– Mii vuvddiimet 910 bileahta odne. Muhto dán jagi ii lean nu buorre dálki go diibmá ja dasa lassin jáhkkan ahte massiimet veahá gehččiid, go eat beassan dán jagi lágidit amatevrra ja hárjehalliid luohkká, juoga mii lea geasuhan dán rádjai, čilge son.
Ođđa gilvu
Son lohká maiddái skohtergilvvuid lágideami hedjonan Finnmárkkus maŋimuš jagiid ja dát lei goalmmát gilvu dán jagi, go gilvoáigodat lea jo farga nohkamin.
Mohtorsearvi leage ožžon jearaldaga lágidit guovtti vahkku geahčen «Tour de Snowcross» gilvvuid, mas Álttá Skohterlihttu lea ovddasvástideaddji lágideaddji ja jerre vuddjiiguin leago dasa beroštupmi.
– Álttás gilvu lea dán mánu 17.beaivvi, muhto Hámmárfeasttas ii leat šat muohta ja nugo gulan šláddariin ahte Leavnnjas iige leat muohta. Mii lágidat jus leat doarvái vuoddjit, loahpaha son.
