Dán jagáš beassáščájáhussii leat Guovdageainnu Dáiddadálu dáiddárat bovden nuorra Guovdageainnu nieidda Elle Sara Oskala čájehit iežas dáidaga.
Dán jagáš beassáščájáhussii leat Guovdageainnu Dáiddadálu dáiddárat bovden nuorra Guovdageainnu nieidda Elle Sara Oskala čájehit iežas dáidaga.
– Háliidan govvidit bohcco ja Sámi luonddu čábbodaga, ráfálašvuođa ja ráinnasvuođa. Mu mielas lea buorre ráhkadit dakkár govaid mat addet gehččiide ráfi dovddu dálá servvodagas gos lea ollu huššá, dadjá Dáiddadálu nuorra guossedáiddár Elle Sara Oskal, gii dál vuohččan čájeha govaidis almmolaš čájáhusas.
– Láhčit saji ođđa dáiddáriidda
Elle Sara lea guhká bargan njuohtamiiguin maid dál viimmat čájeha, iežas vuosttaš almmolaš čájáhusas.
– Mii leat hui rámis ja ilus go beassat láhčit saji ođđa dáiddáriidda, eandalii nuorra dáiddalaš jienaide, dadjá Máret Ánne Sara preassadieđáhusas Dáiddadálu bealis ja bovde olbmuid boahtit almmolaš rahpamii Dáiddadálus.
(ášši joatká gova vuolábealde)
Govva man Elle Sara Oskal lea málen.
Viežžá inpirašuvnna luonddus ja boazodoalus
Elle Sara lea 24-jahkásaš, ja eret Guovdageainnus. Son gazzá dál oahpu ja orru Romssas. Boazodoallu ja luondu addet sutnje inspirašuvnna. Málema lea iešheanalaččat oahppan ja dađistaga bargá dan badjelii ahte ovdánahttit dáiddalaš máhtu. Son geahččaladdá iešguđetlágan málenvugiiguin, muhto dávjá leat máleriijat bealle-abstrákta.
Lea goalmmát geardde go Guovdageainnu Dáiddadállu lágida beassáščájáhusa, ja dán jagáš čájáhus rahppo mánnodaga diibmu 14.00.
