Boazu AS njuovahagas njuvve 430 vildasávzza mannan vahkkus ja leat vuovdin ládje dán vahkkus miehtá Finnmárkku.
Boazu AS njuovahagas njuvve 430 vildasávzza mannan vahkkus ja leat vuovdin ládje dán vahkkus miehtá Finnmárkku.
Nesseby Villsauprodukter fitnodat lea šiehtadan Kuraas biergofitnodagain Narviikkas ja Rema1000 rámbuvrrain vuovdit dán jagáš vildasávzzabierggu. Ovddit jagiid leat buvttadeaddji ieš vuovdán njuolga olbmuide olles Finnmárkkus.
Vahkku dipman
Čoaska ja goike árrageasi dihte de eai leat sávzzat nu buoiddit go diibmá. Borgemánu rájes lei buorre guohtun ja lábbát maid losso doarvái.
– Go biergu dál olle rámbuvrraide, de lea vahkku ollen dipmat. Biergu, mii lea dán vuoru vuovdimis, lea sávzzabiergu maid vuoššá gálláin, lábbáčielgečaskkis ja lábbásteaika. Juovllaide vel gárvána boahkkesávzzačoarbbealli, muitala Nesseby Villsauprodukter beaivválaš jođiheaddji Øystein Nilsen.
Eai olle ieža buot bargat juovllaide
– Ágga manne dán jagi eat hálit ieža vuovdit bierggu, lea go eat olle vuovdit buot juovllaid rádjái, mii fas dagaha ahte mis leat ain bierggut ođđajagis maid rahčat vuovdit, muitala Nilsen.
Dál, go lea Kuraas/Rema ovttasbargošiehtadus, de ožžot buvttadeaddjit oktanaga máksot gálvvu ovddas nu go eará boanddat ožžot geat sáddejit njuovahagaide.
Nilsen lasiha ahte dál besset sii leat dušše boanddat go rámbuvrrat barget vuovdimiin.
Dát šiehtadus lea geahččalanortnet, ii ge leat sihkar movt boahtte jagi šaddá.
