Davvi álbmogiid guovddáš lea máŋgii almmuhan beaivválaš jođiheaddji virggi maŋŋel go Henrik Olsen máhcai ollesáigge politihkkárin. Dál leat viimmat virgádan ođđa beaivválaš jođiheaddji guhte álgá virgái maŋŋel geasseluomu.
Davvi álbmogiid guovddáš lea máŋgii almmuhan beaivválaš jođiheaddji virggi maŋŋel go Henrik Olsen máhcai ollesáigge politihkkárin. Dál leat viimmat virgádan ođđa beaivválaš jođiheaddji guhte álgá virgái maŋŋel geasseluomu.
Terje Ansgar Eriksen lea virgáduvvon Davvi álbmogiid guovddáža ođđa beaivválaš jođiheaddjin.
Virgi almmuhuvvui maŋŋel go Henrik Olsen máhcai sámediggeráđđái ja álggii fas ollesáigge politihkkáriin 2017 válggaid maŋŋel.
– Leamaš guhkes proseassa gávdnat ođđa beaivválaš jođiheaddji. Mii leat hirbmat movttegat go Terje válddii barggu ja jáhkkit son šaddá erenomáš buorre jođiheaddjin, dadjá stivrajođiheaddji Marit Anne Hauan Davvi álbmogiid guovddáža neahttasiidduide.
Eriksen lea eret Birtaváris, Gáivuonas, muhto ássá Ráissas. Son bargá Nordtro AS bargo- ja searvadahttinfitnodaga beaivválaš jođiheaddjin, muhto lávke ođđa virgái maŋŋel geasseluomu.
