Eanandoallodepartemeanta ii leat dohkkehan NBR gáibádusa bidjat HMS-heahtedoaibmabijuid boazodollui, vaikko boazodoallu lea okta Norgga váráleamos ealáhusain.
Distaga lei surgadis lihkohisvuohta Meløy suohkanis go mikrogirdi gahčai, ja guokte olbmo duššaiga.
Leigga Lars Nikolas Angler Kuhmunen (32) ja Eskild Børje Winther Solhaug (59) geat duššaiga go leigga čohkkeme ealu guovllus, dieđihii Váldogádjunguovddáš ikte.
Áitojuvvon ealáhus lea massán vel ovtta nuorra boazodoalli surgadis bargolihkohisvuođa geažil.
Okta Norgga váráleamos ealáhusain
Vaikko NBR gieskat ovddidii gáibádusa bidjat HMS-doaimmaid boazodolliide, olu bargolihkohisvuođaid geažil boazodoalus, de ii váldán Eanandoallodepartemeanta daid vuostá.
– Ii livčče gal dán lihkohisvuođa hehtten go lea girdilihkohisvuohta, muhto lea dehálaš oažžut albma HMS-doaimmaid johtui boazodoalus, lohká NBR nubbijođiheaddji Per John Anti NRK:i.
Sámediggi maŋidan kulturbálgá rahpama
Odne lei Sámedikkis plána rahpat kulturbálgá Sáltoduoddaris, mas guhtta sámi báikki leat šiltejuvvon.
Ikte dieđihii Sámediggi ahte dát rahpan ii šatta, dan surgadis girdilihkohisvuođa geažil.
Mikrogirdigielddus
Ikte dieđihii maiddái Norges Luftsportsforbund ahte buot mikrogirdiduođaštusat suspenderejuvvojit dassážii go sihkarvuođapáhkka lea guorahallojuvvon searvvi njuolggádusaid mielde.
Dat mearkkaša ahte ievttá rájes ii leat lohpi girdit mikrogirdiin Norggas.
– Ággan dan mearrádussii leat dáhpáhusat ja mikrogirdilihkohisvuođat Norggas maŋemuš áiggiid, dieđihii searvi iežaset neahttasiidduin.
Ávvir ii lihkostuvvan oažžut Norgga Boazosápmelaččaid Riikkasearvvi jođiheaddji Ellinor Marita Jåma ságaide.
